एनपीएलमा लुम्बिनीको दोस्रो जित, रोमाञ्चक खेलमा पोखरा ३ विकेटले पराजित

लुम्बिनी लायन्सले नेपाल प्रिमियर लिग क्रिकेटमा रोमाञ्चक जित निकालेको छ ।

कीर्तिपुरस्थित त्रिवि क्रिकेट मैदानमा भएको खेलमा लुम्बिनीले पोखरा एभेन्जर्सलाई ३ विकेटले पराजित गरेको हो । पोखराले दिएको १ सय ५१ रनको लक्ष्य लुम्बिनीले निर्धारित ओभरको २ बल अघि ७ विकेटको क्षतिमा पूरा गरेको हो ।

तीन म्याच हारेको लुम्बिनीले दोस्रो जित हात पारेको हो । अन्तिम ओभरमा १० रन चाहिएको अवस्थामा सन्दिप जोराले २ चौका सहित १० रन बनाएसँगै लुम्बिनीले पोखारमाथि रोमाञ्चक जित निकालेको हो । लुम्बिनीको जितमा कप्तान रोहित पौडेलले ४०, निरोशन डिक्वेलाले २२ र सन्दिप जोराले नट आउट रहँदै २५ रन बनाए ।

त्यसअघि पहिले ब्याटिङ गरेको पोखराले निर्धारित ओभरमा अल आउट हुँदै १ सय ५० रन बनाएको थियो । उसका लागि एडम रोशिङटनले ८१ र जेम्स निशमले नट आउट रहँदै ५१ रनको अर्धशतकिय इनिङ्स खेलेका थिए । आजको खेलको नतिजा पछि लुम्बिनी पाँच खेलबाट ४ अंक सहित अंक तालिकाको पाँचौ स्थानमा उक्लिएको छ भने ४ खेलमा एक मात्र जित निकालेको पोखरा २ अंक सहित सातौं स्थानमा झरेको छ ।