मलेसियालाई हराउँदै नेपाली यू–१९ टोली एसिया कपका लागि छनोट

नेपाल एसीसी पुरुष यू–१९ प्रिमियर कपको फाइनलमा प्रवेश गरेको छ । सेमिफाइनलमा मलेसियालाई ९ विकेटले पराजित गर्दै नेपाल उपाधि नजिक पुगेको हो ।

फाइनल पुगेसँगै नेपालले एसीसी पुरूष यू–१९ एसिया कपमा समेत स्थान सुरक्षित गरेको छ । यूएईको अजमानस्थित सेभेन डिस्ट्रिक्ट मैदानमा नेपालले टस जितेर फिल्डिङ रोजेपछि सुरूवातमा ब्याटिङ गरेको मलेसियाले १७ ओभर २ बलमा सबै विकेट गुमाएर ५१ रन मात्र बनाउन सक्यो । नेपाली बलरसामु निरिह बनेको मलेसियाले १३ रन बनाउँदा ७ विकेट गुमाएको थियो ।

उसका लागि मोहम्मद फातुलले ११ र हम्जा पांगीले सर्वाधिक १३ रन जोडे । अन्य ब्याटरले दोहोरो अंकमा रन बनाउन सकेनन् । नेपालका लागि नितेश कुमार पटेलले ८ ओभरमा २४ रन खर्च गरेर ४ विकेट लिए । चन्दन रामले ३ तथा अपराजित पौडेल, अशोक धामी र रोशन विश्वकर्माले १–१ विकेट हात पारे ।

जवाफमा ५२ रनको सामान्य लक्ष्य नेपालले ७ ओभर ५ बलमा केवल १ विकेट गुमाएर पुरा ग¥यो । निरज ४ रनमा आउट भए पनि बंश क्षेत्री २३ र निश्चल क्षेत्रीले अविजित १५ रनको योगदान दिएपछि नेपाल फाइनलमा प्रवेश गरेको हो । मलेसियाका लागि पांगीले १ विकेट लिए ।

नेपालले अब उपाधिका लागि ओमान र यूएईबीच हुने अर्को सेमिफाइनलको विजेतासँग प्रतिस्पर्धा गर्नेछ । फाइनल सोमबार हुनेछ । प्रतियोगिताको फाइनल पुग्ने दुई टोलीसहित तेस्रो स्थान प्राप्त गर्ने टिमले यू–१९ एसिया कपमा स्थान बनाउने छन् ।