एनपीएल सिजन टुः सुदूरपश्चिम प्लेअफमा पुग्दा जनकपुर अझै अंकविहीन

सुदूरपश्चिम रोयल्स नेपाल प्रमियर लिग क्रिकेटको प्लेअफमा प्रवेश गरेको छ ।

गत संस्करणको विजेता टोली जनकपुर बोल्ड्स विरुद्ध आज ६ विकेटको जित निकाल्दै प्लेअफ समिकरण खेल्ने पहिलो टोली बनेको हो । कीर्तिपुरस्थित त्रिवि क्रिकेट मैदानमा जनकपुरले दिएको १ सय ४६ रनको लक्ष्य सुदूरपश्चिमले मात्र ४ विकेटको क्षतिमा १७ दशमलव ४ ओभरमा पूरा गर्यो ।

जारी लिगमा अपराजित रहँदै सुदूरपश्चिमले पाँच खेलबाट १० अंक जोडेर प्लेअफ खेल्ने भएको हो । आजको खेलमा पराजित भएको जनकपुर भने अंकविहीन बनेको छ । आजको पराजयसँगै जनकपुरको प्लेअफ पुग्ने सम्भावना भने कमजोर देखिएको छ । यद्यपि जनकपुरलाई त्यसका लागि अन्य टोलीको खेलको नतिजामा भर पर्नुपर्ने बाध्यता छ ।

यसैबीच लुम्बिनी लायन्सले नेपाल प्रिमियर लिग क्रिकेटमा रोमाञ्चक जित निकालेको छ । कीर्तिपुरस्थित त्रिवि क्रिकेट मैदानमा आज भएको पहिलो खेलमा लुम्बिनीले पोखरा एभेन्जर्सलाई ३ विकेटले पराजित गरेको हो । पोखराले दिएको १ सय ५१ रनको लक्ष्य लुम्बिनीले निर्धारित ओभरको २ बल अघि ७ विकेटको क्षतिमा पूरा गरेको हो ।

तीन म्याच हारेको लुम्बिनीले दोस्रो जित हात पारेको हो । अन्तिम ओभरमा १० रन चाहिएको अवस्थामा सन्दिप जोराले २ चौका सहित १० रन बनाएसँगै लुम्बिनीले पोखरामाथि रोमाञ्चक जित निकालेको हो । लुम्बिनीको जितमा कप्तान रोहित पौडेलले ४०, निरोशन डिक्वेलाले २२ र सन्दिप जोराले नट आउट रहँदै २५ रन बनाए ।

त्यसअघि पहिले ब्याटिङ गरेको पोखराले निर्धारित ओभरमा अल आउट हुँदै १ सय ५० रन बनाएको थियो । उसका लागि एडम रोशिङटनले ८१ र जेम्स निसमले नट आउट रहँदै ५१ रनको अर्धशतकिय इनिङ्स खेलेका थिए ।