खाद्य व्यवस्था तथा व्यापार कम्पनी लिमिटेडका प्रमुख कार्यकारी अधिकृत मोहनप्रकाश चन्दले साधन स्रोतको सीमितताका कारण खाद्य सुरक्षाको सुनिश्चितता र उपभोग्य वस्तुको सर्वसुलभ र सहज आपूर्ति व्यवस्थामा सोचे अनुसारको प्रगति हासिल हुन नसकेको स्वीकार्नु भएको छ । रेडियो कान्तिपुरको नियमित कार्यक्रम दी हेडलाइनर्समा कुरा गर्दै उहाँले निजी क्षेत्रसँग प्रतिस्पर्धा गर्नका लागि सरकारले खुकुलो नीति अख्तियार गर्नुपर्ने बताउनुभयो । खाद्य संकटग्रस्त क्षेत्रमा उपभोग्य सामग्रीको उपलब्धता बढाउने काममा कम्पनीले ठूलै सफलता हात पारे पनि किसानका उत्पादनको खरीद, भण्डारन र बिक्रीका क्षेत्रमा धेरै नै काम बाँकी रहेको चन्दले उल्लेख गर्नुभयो ।

हाल मुख्य तीन शहर काठमाडौं, पोखरा र सुर्खेतमा अनलाइन मार्फत् पनि बिक्री शुरु गरिएको र अन्यत्र पनि आउटलेट बिस्तारसँगै अनलाइनबाटै व्यापार प्रवद्र्धन गर्ने पक्षमा आफू रहेको उहाँले बताउनुभयो । दरबन्दी अनुसारको कर्मचारी भर्ना गर्न पनि समय लागेकाले कम्पनीको सेवा प्रवाहमा चुस्तता आउन नसकेको भन्दै उहाँले छिट्टै नै देखिने र अनुभुत हुने काम गर्ने प्रतिबद्धता जनाउनु भयो ।