ताप्लेजुङमा आयोजना हुने सिरिजंगा गोल्डकप फुटबल प्रतियोगिताको खेल तालिका सार्वजनिक भएको छ । यही मंसिर २३ गते देखि हुने गोल्डकपको आयोजक सिरिजंगा स्पोर्टिङ्ग क्लबले शनिबार खेल तालिका सार्वजनिक गरेको हो । 

प्रतियोगिताको उद्घाटन खेलमा आयोजक तेल्लोक स्पोर्टिङ्ग क्लबले धनकुटाको साँगुरीगढी एफसीसँग प्रतिस्पार्धा गर्ने भएका छन् । सिरिजङ्गा गाउँपालिका–४ तेल्लोक माविको मैदानमा हुने गोल्डकप फुटबल प्रतियोगिताको फाइनल खेल मंसिर २९ गते हुनेछ ।

प्रतियोगितामा एक भारतीय सहित आठ टिमको सहभागिता रहेको आयोजक तेल्लोक स्पोर्टिङ्ग क्लबले जनाएको छ । 

प्रतियोगितामा आयोजक तेल्लोक स्पोर्टिङ्ग क्लब, मोरङको सिरिजङ्गा स्पोर्टिङ्ग क्लब, धनकुटाको साँगुरीगढी एफसी, झापाको न्यू स्टार क्लब, उदयपुरको ब्रदर एफसी, सुनसरीको मरिक एफसी, पाँचथर एफसी र भारतको पारिजात संघ एफसीबीच प्रतिस्पर्धा हुनेछ । 

प्रतियोगिताको विजेताले २ लाख ५० हजार र उपविजेताले १ लाख ५० हजार पुरस्कार प्राप्त गर्ने आयोजक तेल्लोक स्पोर्टिङ क्लबका अध्यक्ष अर्जुन भट्टराईले जानकारी दिनुभयो ।