तीन दिन अघि सर्लाही परवानीपुर–१ का चन्द्रबहादुर थापाले गत आइतबार कलैयाबाट ना ४ च २२६१ नम्बरको पिकअप भ्यान लिएर वीरगञ्ज गए । ५ हजार भाडामा मरिच बोक्न गएको पिकअपमा सिम्रौनगढका ‘सुभाष’ भन्ने व्यापारीको नाममा वीरगञ्जको स्वीमिङ पुल आसपासको एक गोदामबाट २० क्वीन्टल कालो मरिच लोड गरे ।

दिनको साढे २ बजे उनले मरिच बोकेर पिकअप लिएर हिँडे । कलैया हुँदै सिम्रौनगढ बजारसम्म पुग्नुपर्ने भएकोले सहरको मुर्ली चोक नपुग्दै हुन्डाई सो रुम नजिक मोटरसाइकलमा आएका दुई जनाले पिकअप रोक्न लगाए ।

‘क्राइम ब्रान्च’ को प्रहरी हुँ भन्दै दुबैले चालक थापासित पिकअपको साँचो, मरिचको भ्याट बिल, ५ हजार नगद, ब्लुबुक खोस्यो र थापालाई बाइकमा बसाएर ५/६ किमी पश्चिममा पर्ने ड्राइपोर्ट तर्फ लग्यो । पिकअप त्यही मुर्ली चोकमै छाडे । ड्राइपोर्टको व्यस्त रोड छेउमा थापालाई लगेर केही बेर राखे । र एकैछिनमा गाडी लिएर छिटो भाग, नभए खतरा हुन्छ भन्दै ड्राइपोर्ट पुर्‍याइएका पिकअप पार्किङ गरिएको रहेछ । 

दुबैले चालक थापालाई पिकअप देखाए । पिकअपमा लोड गरिएको मरिच थिएन । मरिच गायव गरेर पिकअप मात्र पार्किङ गरिएको थियो । पिकअपको साँचो पिकअपमै थियो ।

चालक थापालाई नियन्त्रणमा लिएर अर्कैले गाडी चलाएर मरिच गायब गरेको रहेछ । मरिच गायव गर्ने दुबैले पिकअप भ्यान देखाएपछि चालक थापा डरले खाली पिकअप रित्तोहात सोझै पिकअप धनीको कलैयास्थित घरमा लिएर आइपुगे । र सबै घटना पिकअप धनीलाई सुनाए । 

घटनाबारे पिकअप धनीले सबै विवरण सुनेर व्यापारी सुभाषलाई फोन गरे । र उनीसहित १० जना घटनास्थलल तर्फ वीरगञ्ज लागे । पर्सा जिल्ला प्रहरी कार्यालय वीरगञ्जमा पुगे । एसपी रेवती ढकाल र क्राइम ब्रान्चको इन्सेक्टरलाई भेटे ।

प्रहरीले त्यही बेला चालक थापालाई नियन्त्रण लियो । दुई दिन हिरासतमा राखेर तेस्रो दिन ३० असोजमा उनका आफन्तलाई बोलाएर बुझ्न लगाई छाड्यो । मरिच अझै गायव नै छ । व्यापारी र प्रहरीले चालकमाथि शंका गरिरहेको छ । चालकले आफ्नो संलग्नता इन्कार गरिरहेका छन् । चालकको इन्कारीमाथि पिकअप भ्यान धनी कलैया उपमहानगरपालिका–१ का रामबालक साह तेली पनि विश्वस्त छ । 

पर्सा जिल्ला वीरगञ्जका प्रहरी उपरिक्षक रेवती ढकालले घटनाबारे अनुसन्धान भइरहेको दाबी गरेका छन् । घटनास्थलमा सीसी क्यामराले कैद गरेको फुटेजमा भीडभाड देखाएकोले व्यक्ति चिन्न नसकिए पनि मरिच गायव गर्ने दुबै चढेको बाइकको नम्बर भने पहिचानमा आएको प्रहरी स्रोतले बतायो ।

यसरी नाटकीय शैलीमा गायब भएको १० लाख बजार मूल्य पर्ने उक्त २५ बोरा (२० क्वीन्टल) मरिचबारे न त प्रहरीले जिम्मेवारी लिएको छ, नत अरु कसैले । त्यसैले घटना रहस्मय बनेको छ । घटना भएको चार दिन बितिसक्दा मरिचको अतोपत्तो छैन् ।

पिकअप धनीसित मरिच व्यापारीले मरिचको मूल्य तिर्नुपर्ने दाबी गरिरहँदा भाडामा पिकअप दिएका पिकअप धनीलाई अक्क न बक्क भएको छ । ‘व्यस्त बजारबाट दिन दहाडै नाटकीय शैलीमा गायव भएको मरिचबारे अनुसन्धान हुनुपर्छ,’ पिकअप धनी रामबालक साह तेलीलले भने, ‘हाम्रो चालकलाई प्रहरीले पनि अनाहकमा दुई दिन थुन्यो । र व्यापारीले पनि आक्रोसित भएर कुट्यो ।’ 

घटना सुनाउँदा उल्टै प्रहरीबाट थनिनु गरेको उनले गुनासो गरे । उता एसपी ढकालसित घटनाको अनुसन्धानबारे प्रतिक्रिया लिंदा उनले पीडित पक्षका चालक र पिकअप धनीले प्रहरी हुँ भन्दै मरिच गायव गरेको विषय आफूलाई नसुनाएको बताए । प्रतिक्रिया दिने क्रममा चालकलाई पठाइदिन पत्रकारलाई नै उनले अर्हाए जस्तो प्रतिक्रिया दिए । 

‘अनुसन्धानको ‘बेसिक’ प्रक्रियाबाट अनुसन्धान गर्दै छु । अनुसन्धान भएपछि पुरै बताउँछु,’ उनले भने, ‘प्रहरी संलग्नता पाइए उसको जागिर त्यतिखेरै चट्ट हुन्छ । बर्खास्त गर्छु ।’ उता चालक थापाको मोबाइल खोसिएकाले उनीसित प्रतिक्रिया लिन सम्भव भएन ।

‘पिकअप छाडेर मरिच गायब गर्ने दई जनाको समूहमा देखिएका दुबैले प्रहरी जस्तो बोल्ने गरेको र कपाल कटिङ, हाउभाउ सबै प्रहरीको जस्तै थियो,’ मोबाइलबिहीन बनेका चालक थापाको भनाई उद्दृत गर्दै पिकअप धनी रामबालकले भने, ‘चालकलाई उनका काका प्रकाश थापाले दशैं मान्न प्रहरीबाट बुझेर लगेका छन् ।’