कोरिया मैत्री अस्पतालको आकस्मिक बाहेकका सेवा बन्द
श्रावण ३१, २०७७ | भक्तपुर
भक्ततपुरको नेपाल कोरिया मैत्री अस्पतालमा कार्यरत नर्समा कोरोना भाइरसको संक्रमण पुष्टि भएपछि आकस्मिक बाहेकका अन्य सेवा बन्द गरिएको छ ।
सो अस्पतालमा कार्यरत मध्यपुर थिमि नगरपालिकाका ३ स्टाफ नर्स सहित ४ जनामा कोरोना भाइरस संक्रमण पुष्टि भएपछि आकस्मिक बाहेकका अन्य सेवा बन्द गरिएको अस्पतालले जनाएको छ ।
मध्यपुर थिमि नगरपालिकाका प्रमुख मदनसुन्दर श्रेष्ठका अनुसार अस्पतालमा कार्यरत ३ स्टाफ नर्स र एक जना सहयोगीमा शुक्रबार कोरोना संक्रमण पुष्टि भएको हो ।
अस्पतालका कर्मचारीमा कोरोना पुष्टि भएपछि अर्को सूचना जारी नभएसम्म अस्पातालको आईसीयू, ओपीडी लगायत सेवा बन्द गर्ने निर्णय गरेको नगरप्रमुख श्रेष्ठले जानकारी दिनुभयो ।
संक्रमित चारै जनालाई अस्पतालको आइसोलेशनमा राखिएको छ । अस्पतालको मेडिकल अफिसर लगायत कर्मचारीको पनि पीसीआर परीक्षण गर्ने तयारी भईरहेको उहाँले जानकारी दिनुभयो ।