गोताखोर ल्याएर बेपत्ता भएकाको खोजी सुरु
आश्विन २, २०७६ | संखुवासभा
संखुवासभाको अरुण नदीमा जिप खस्दा बेपत्ता भएका ६ जनाको गोताखोरको टोलीले खोजीकार्य सुरु गरेको छ । सशस्त्रका ४ जना गोताखोर ल्याएर अरुण नदीमा बेपत्ता भएकाको खोजीकार्य सुरु गरिएको हो । मौसम प्रतिकूलताका कारण हेलिकप्टर चार्टर गरेर गोताखोर टोली ल्याइएको हो ।
धमिलो पानी र गहिरो नदी भएकाले हिजो खोजीमा कठिनाई भएको जिल्ला प्रहरी कार्यालय संखुवासभाका डीएसपी मीमबहादुर लामाले बताउनुभयो ।
(यो पनि पढ्नुहोस्) :
अक्करे भीरबाट अरुणमा जीप खस्दा ६ जना बेपत्ता
गत मंगलबार राति खाँदबारीबाट बिरामी बोकेर धरान जाँदै गरेको को १ ज ३७४९ नम्बरको जिप धर्मदेवी ८ मा पर्ने अक्करको भीरबाट अरुण नदीमा खस्दा ६ जना बेपत्ता भएका थिए ।
बेपत्ता हुनेमा खाँदबारी नगरपालिका–९ का एकै परिवारका ३ जना छन् । संगम श्रेष्ठ उनकी श्रीमती सदिक्षा श्रेष्ठ र दुई महिने छोरा समिर बेपत्ता भएका हुन् । त्यस्तै, प्रमेश थापामगर, खबरमान पिठाकोटी र चालक सन्तोष विश्वकर्मा पनि बेपत्ता छन् ।