कात्तिक १० गतेभित्र उम्मेदवारको सिफारिस पठाउन निर्देशन 

रेडियो कान्तिपुर संवाददाता

आश्विन २९, २०७६ | काठमाडौं

सत्तारुढ नेपाल कम्युनिष्ट पार्टी (नेकपा) ले आगामी मंसिर १४ गतेका लागि तोकिएको  उपनिर्वाचनका लागि कात्तिक १० गतेभित्र उम्मेदवारको सिफारिस पठाउन मातहतका निकायलाई निर्देशन दिएको छ ।

काठमाडौंको बालुवाटारस्थित प्रधानमन्त्री निवासमा आज बिहान बसेको सचिवालय बैठकले उपनिर्वाचन हुने क्षेत्रबाट तीनजना उम्मेदवरको नाम पार्टी केन्द्रीय कार्यालयमा पठाउन निर्देशन दिएको हो । सोही ३–३ जनाको नामबाट नेकपाले निर्वाचन हुने क्षेत्रमा एक जनालाई उम्मेद्वार बनाउनेछ । 

प्रतिनिधि र प्रदेशसभा सदस्यको उपनिर्वाचनका लागि सम्बन्धित निर्वाचन क्षेत्रिय कमिटी वा जिल्ला र प्रदेश कमिटीले उम्मेदवारको नाम सिफारिस गर्नुपर्ने निर्णय भएको सचिवालय सदस्य एवम् प्रवक्ता नारायणकाजी श्रेष्ठले जानकारी दिनुभयो ।

यस्तै नगर र गाउँपालिका प्रमुखको उम्मेद्वारीका लागि सम्बन्धित स्थानीय तह वा जिल्ला कमिटीको तहमा प्रदेश कमिटीले उम्मेद्वार चयन गर्ने श्रेष्ठले वताउनुभयो । सचिवालय बैठकले वडा सदस्यका लागि भने स्थानीय तहको कमिटीले नै टुंगो लगाउने गरी निर्णय गरेको छ ।

मंसिर १४ गते प्रतिनिधिसभा, प्रदेश सभा र स्थानीय तहमा गरि ७ वटै प्रदेशमा उपनिर्वाचना हुँदैछ । प्रतिनिधिसभाका लागि कास्की क्षेत्र नं. २, प्रदेश सभाका लागि बाग्लुङ २(ख), दाङ ३ (ख) र भक्तपुर १ (क) तथा अरु स्थानीय तहमा गरि ५२ ठाउँमा उपनिर्वचन हुनेछ । 

यस्तै नेकपा सचिवालय बैठकले पार्टी संगठन विभागमा ३ जना सदस्य थप गरेको छ । अष्टलक्ष्मी शाक्य, भानुभक्त ढकाल र हरि अधिकारीलाई संगठन विभागको सदस्य बनाईएको प्रवक्ता श्रेष्ठले जानकारी दिनुभयो । ३ जना सदस्य थपिएसँगै नेकपाको संगठन विभाग ५ सदस्यीय भएको छ । यद्यपी विभागले पूर्णता भनेको अझै पाएको छैन ।  


प्रतिक्रिया