इण्डियाविद्धरुको खेलमा नेपाल ७ विकेटले पराजित
कार्तिक २८, २०७६ | काठमाडौं
एसीसी इमर्जिङ एसिया कपको शुरुआत नेपालले हारबाट गरेको छ । इण्डियाविद्धरुको खेलमा नेपाल ७ विकेटले पराजित भयो । बंगलादेशको ढाकामा भएको खेलमा १ सय ९४ रनको लक्ष्य इण्डियाले तले ४२ ओभरमा ३ विकेटको क्षतिमा भेट्टायो ।
इण्डियाको जितमा सनबीर सिंहले ५६ रनको योगदान दिए । त्यस्तै अर्मान जाफर ५१ रनमा अविजित रहे । कप्तान बी आर शरथ ४९ रनमा आउट भए । नेपालका करण केसी, सुसन भारी र ललित नारायाण राजवंशीले समान १ विकेट लिए ।
यसअघि इण्डियाले टस जितेर फिल्डिङ रोजेपछि ब्याटिङ थालेको नेपाल ४५ ओभरमा १ सय ९३ रनमा अल आउट भयो । नेपालका लागि पवन सरार्फले ४९ बलमा ७ चौका र २ छक्का सहित सर्वाधिक ५६ रनको योगदान दिए । नेपालले आज खराब शुरुआत गरेको थियो ।
पहिलो ओभरको दोस्रो बलमा कप्तान ज्ञानेन्द्र मल्ल शून्यमा आउट भए । यसै खेलबाट नेपाली टोलीमा डेब्यू गरेका ओपनर कुशल भुर्तेलले पनि २८ रनमात्रै जोडे । दोस्रो विकेटका लागि शरद भेषावकर र कुशल भुर्तेलले ५४ रनको साझेदारी गरेका थिए ।शरद ४४ रनमा आउट भए । नेपालका दीपेन्द्रसिंह ऐरीले २४ र करण केसीले २० रनको योगदान गरे ।
अन्यले दोहोरो अंकको स्कोर गर्न सकेनन् । इण्डियाका सौरभ दुबेले सर्वाधिक ४ विकेट लिए । यश राठोडले ३ तथा पार्थ रेखाडेले २ विकेट लिए ।
समूह ए मा आज ओमानले श्रीलंकालाई ४ विकेटले हराएको छ । दोस्रो खेलमा आगामी शनिबार नेपालले हङकङको सामना गर्नेछ । दुबै समूहको शीर्ष २ टोलीले अघिल्लो चरणमा प्रवेश गर्नेछन् ।