नारायणगढ–मुग्लिन सडकखण्ड र पृथ्वी राजमार्ग अवरुद्ध
भाद्र १८, २०७४ | चितवन
लगातारको बर्षाले खसेको पहिरोका कारण हिजो साँझदेखि अवरुद्ध नारायणगढ–मुग्लिन सडकखण्ड अझै खुल्न सकेको छैन । सो सडकखण्ड अन्तर्गतका कालीखोला, मुग्लिनको मुख, चारकिलो भालुढुङ्गा, जलबिरे र चोरखोला लगायतका स्थानमा पहिरो खसेपछि हिजैबाट सडक अवरुद्ध छ ।
बिहानैदेखि पहिरो पन्छाउने कार्य जारी रहेको मुग्लिन नारायणगढ सडक निर्माण आयोजनाका इन्जिनियर शिव खनालले जानकारी दिनुभयो । सो सडकमा पहिरो खसेका ठाउँमा लेदो बगिरहेको र पानी परिरहेकाले पहिरो पन्छाउन अप्ठ्यारो परिरहेको खनालले बताउनुभयो । खनालका अनुसार ५ किलो र जलबीरेको विच भागमा पर्ने तुइनमा ठूलो ढुंगा खसेकाले फुटाएर मात्र सडक सञ्चालनमा आउने भएकाले आज आधा दिनसम्म सडक अवरुद्ध हुनेछ ।
स्तरोन्नतीका क्रममा रहेकाले पहिरो खस्ने क्रम बढी हुँदा रातको समयमा सो सडक बन्द गरिँदै आएको छ । रातभर रोकिएर बसेका सवारी साधन बिहान पनि पहिरो खसेर सडक अवरुद्ध भएपछि अलपत्र परेको सहकर्मी बिमल खतिवडाले जनाएका छन् ।
यसैबीच निरन्तरको बर्षाले पहिरो खसेपछि पृथ्वी राजमार्ग पनि हिजैसाँझदेखि अवरुद्ध छ । राजमार्गको फिस्लिङ र घोप्टे भिरमा पहिरो खसेको छ । पहिरो पन्छाउनका लागि गजुरीबाट एक्साभेटर लगेर बाटो पन्छाउने काम शुरु गरेको सहकर्मी हरिहरसिंह राठौरले जनाएका छन् ।