इजरायलले गाजाको उत्तरी क्षेत्रस्थित बेइट लाहिया शहरमा गरेको आक्रमणमा ६० जनाको मृत्यु भएको छ । गाजाद्धारा सञ्चालित स्वास्थ्य मन्त्रालयका अनुसार इजरायलले गरेको हवाई आक्रमणमा सो हताहती भएको हो । सो आक्रमणमा कयौंको संख्यामा घाइते भएका छन् । 

इजरायलले आवासीय भवन भएका क्षेत्रमा हवाई आक्रमण गरेकोे गाजाद्धारा सञ्चालित स्वास्थ्य मन्त्रालयलाई उदृत गर्दै बीबीसीले जनाएको छ । भग्नावशेषमुनि समेत केही नागरिक फसेको हुन सक्ने बताइएको छ । स्थानीय अस्पतालमा उपचाररत घाइतेका लागि औषधी र चिकित्सकको समेत अभाव भएकाले उपचारमा समस्या भएको अन्तर्राष्ट्रिय संचारमाध्यमले जनाएका छन् । 

यद्यपी, आक्रमणबारे भने इजरायलले कुनै पनि प्रतिक्रिया जनाएको छैन । गत दुई हप्तादेखि इजरायल डिफेन्स फोर्सले उत्तरी गाजाका जबलिया, बेइट लाहिया र बेइट हानौन क्षेत्रमा कारबाही जारी राखेको छ ।