नेत्र विक्रम चन्दसहित चार नेताविरुद्ध ३५ दिने पक्राउ पूर्जी जारी
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2023/news/biplav-1701697499.jpg&w=700&height=600)
मंसिर १८, २०८० | काठमाडौं
नेपाल कम्युनिष्ट पार्टीका महासचिव नेत्र विक्रम चन्दसहित चार जना नेताविरुद्ध काठमाडौं जिल्ला अदालतले पक्राउ पुर्जी जारी गरेको छ ।
३५ दिन भित्र अदालतमा उपस्थित हुन आदेश जारी गर्दै सो पार्टीका अध्यक्ष चन्दसहित स्थायी समिती सदस्य खड्कबहादुर विश्वकर्मा, केन्द्रिय सदस्य माइला लामा र अखिल नेपाल किसान महासंघ क्रान्तिकारीका अध्यक्ष राजु कार्की विरुद्ध पक्राउ पूर्जी जारी गरिएको काठमाडौं जिल्ला अदालतका सूचना अधिकारी दिपक दाहालले जानकारी दिनुभयो ।
अदालतका अनुसार २०७६ असोज ९ मा राज्य विरुद्धको कसुर मुद्दा दायर भएको थियो । सोही मुद्दाका आधारमा उनीहरुविरुद्ध पक्राउ पूर्जी जारी गरिएको दाहालले बताउनुभयो ।
अदालतले आज गोरखापत्रमा सूचना प्रकाशित गर्दै उनीहरुविरुद्ध पक्राउ पूर्जी जारी गरिएको जनाएको हो । तोकिएको समय भित्रमा उपस्थित नभए कानुन अनुसार मुद्दा अघि बढ्ने सूचनामा उल्लेख छ ।
![](http://radio-assets-cdn.ekantipur.com/uploads/source/news/2023/news/ktmcourt-1701697426.png)