कम्युनिष्ट पार्टी स्थापना दिवसका अवसरमा एमालेले आयोजना गरेको विशेष कार्यक्रममा जीप दुर्घटनामा सो पार्टीका तत्कालिन महासचिव मदन भण्डारीको निधन भएको बिषयले प्रवेश पाएको छ । 

भण्डारीको निधन भएको घटनाको छानविन माग गर्दै गरिएको आन्दोलनको बिषय समेत समेटेर तयार पारिएको भिडियो सामग्रीमा कंग्रेस नेतृत्वको तत्कालिन सरकारको आलोचना गरिएको थियो । त्यसपछि कार्यक्रमलाई सम्वोधन गरेका नेपाली कांग्रेसका सभापति एवम् पूर्वप्रधानमन्त्री शेरबहादुर देउवाले मदन भण्डारीको हत्यारा एमालेले पत्ता लगाउन नसकेको टिप्पणी गर्नुभयो ।

पटक पटक सत्तामा पुगेपनि एमालेले भण्डारीको हत्यारा पत्ता लगाउन नसकेको र कंग्रेसलाई दोष दिन खोजिएको देउवाको भनाइ थियो ।

यसैबीच, पूर्वराष्ट्रपति विद्या भण्डारीले एमालेका तत्कालिन महासचिव मदन भण्डारीको निधनपछि आफ्नो राजनीतिक जीवन शुरु भएको बताउनुभयो ।

भण्डारीको निधनपछि उहाँको सपना पुरा गर्न आफू राजनीतिमा होमिएको पूर्वराष्ट्रपति भण्डारीले बताउनुभयो ।

२०५० साल जेठ ३ गतेचितवनको दासढुंगामा भएको जीप दुर्घटनामा एमालेका तत्कालिन महासचिव भण्डारी र अर्का नेता जीवराज आश्रितको निधन भएको थियो । सो घटनालाई एमालेले रहस्यमय भन्दै आएको छ ।