समाचार लेखेकै आधारमा दृष्टि अनलाइनका सञ्चालक शम्भु श्रेष्ठ लगायतमाथि अदालतको अवहेलना मुद्दामा उपस्थित हुन दिएको आदेशले प्रेस स्वतन्त्रतामाथि हमला भएको भन्दै समाजवादी प्रेस संगठन नेपालले आपत्ति जनाएको छ । संगठनले विज्ञप्ति जारी गर्दै विशेष अदालतको आदेशले ‘नेपालको न्यायलयले नेपाली पत्रकारिता क्षेत्रलाई शंका र प्रतिशोधको दृष्टिकोणले हेर्छ भन्ने बुझाईलाई थप प्रष्ट पारेको उल्लेख गरेको छ । 

विशेष अदालतले मंगलबार तीन दिनभित्र आफैं उपस्थित हुन सञ्चालकश्रेष्ठसहित दृष्टिका पत्रकारलाई आदेश दिएको थियो । सो आदेश प्रेस काउन्सिल नेपालको कार्यक्षेत्रमाथि ठाडो अतिक्रमण भएको समाजवादी प्रेस संगठनको ठहर छ । महासचिव रोहित दाहालद्वारा जारी विज्ञप्तिमा अदालतको आदेश फिर्ता लिन संगठनले माग गरेको छ ।