प्रदेश ५ मा डेंगुको संक्रमण बढ्दै गएको छ । सामाजिक विकास मन्त्रालयको स्वास्थ्य महाशाखाका अनुसार अहिलेसम्म प्रदेशमा ८८ जनामा डेंगुको संक्रमण भेटिएको छ । सबैभन्दा धेरै संक्रमण रुपन्देहीमा छ ।

सरकारले कृषि कर्जालाई प्राथमिकतामा राखेको बताएपनि किसानले पाउन सकेका छैनन् । कृषि कर्जाका लागि राष्ट्र बैंकले कुल कर्जाको १० प्रतिशत कृषि क्षेत्रमा लगानी गर्नुपर्ने व्यवस्था गरेको छ । तर, बैंकहरुले दिने कृषि कर्जा किसानहरुका लागि अनुकूल हुन सकेको उनीहरुको गुनासो छ ।

रुपन्देहीका अगुवा किसानले उपभोक्ता मूल्य नबढाइ दूधको मूल्य बढाउन सुझाव दिएका छन् । सरकारले दूधको मूल्य बढाउने तयारी सहित सिफारीस समिति गठन गरेको केही समय पछि जिल्लाका किसानले यस्तो सुझाव दिएका हुन् ।

पूर्वाधार विकासका कामलाई छिटो छरितो र प्रभावकारी बनाउन रुपन्देहीको बुटवल उप–महानगरपालिकाले उपभोक्ता समितिमार्फत काम थालेको छ । नगर र वडा दुवै स्तरका योजना जनसहभागितामा सञ्चालन गरिएको उपमहानगरले जनाएको छ । 

बुद्धकालीन सभ्यताको झल्को दिन भन्दै बुद्ध जन्मस्थल लुम्बिनीलाई हरियाली बनाउने अभियान सुरु भएको छ । लुम्बिनी विकास कोषले फलफूल र कल्पवृक्षका बिरुवा रोपेर लुम्बिनीलाई हरियाली बनाउन थालेको हो ।  

रुपन्देहीमा ९ वर्षअघि निर्माण सुरु भएको पुल प्राविधिक त्रुटीका कारण अझै सकिएको छैन । रुपन्देहीको मणिग्राम र मोतिपुर जोड्ने पुल ९ वर्षदेखि अलपत्र परेको हो ।  दुई वर्षमा सक्ने गरी एलिट कन्स्ट्रक्सन प्रालिले २०६७ असार २५ गते ठेक्का सम्झौता गरेको थियो ।