आफ्नो तेल उत्पादन केन्द्रमा आक्रमण गर्ने इरानलाई जवाफ दिने चेतावनी साउदी अरबले दिएको छ । आक्रमणमा प्रयोग भएको हतियार इरानको भएको पुष्टि भैसकेकाले थप अनुसन्धान पछि कारवाहीमा जान सक्ने साउदीका विदेशमन्त्री अदेल अल जुबैरले बताउनुभयो ।

आगामी राष्ट्रपतीय निर्वाचन बहिष्कार गर्न अफ्गानिस्तानको तालेवान विद्रोहीले शिक्षक, विद्यार्थी तथा शैक्षिक संस्थामा काम गर्ने कर्मचारीलाई चेतावनी दिएको छ । अन्यथा विभिन्न मतदान केन्द्रमा हुने आक्रमणको सामना गर्नुपर्ने तालेवानले चेतावनी दिएको छ ।

इजरेलमा ५ महिनाको अवधिमा दोश्रो पटक खाह्वान गरिएको आम निर्वाचनअन्तर्गत मतदान भइरहेको छ । गत अप्रिलमा भएको आमनिर्वाचनमा कुनै पनि दलले आवश्यक बहुमत ल्याउन असफल भएपछि पुन: निर्वाचन गरिएको हो ।

अमेरिकाका राष्ट्रपति डोनाल्ड ट्रम्पले जापानसँग प्रारम्भिक व्यापार सम्झौता भएको  बताउनुभएको छ । ह्वाइट हाउसमा सञ्चारकर्मीसँग कुरा गर्दै राष्ट्रपति ट्रम्पले जापानसँग डिजिटल व्यापारबारे प्रारम्भिक सहमति भइसकेको र केही साताभित्रै कार्यन्वयनमा आउने बताउनुभएको हो ।

अफ्गानिस्तानमा गत अगष्ट महिनामा प्रत्येक दिन ७४ जनाले ज्यान गुमाएको तथ्य सार्वजनिक भएको छ । मुलकभर विश्वासै गर्न नसकिने खालको हिंसामा वृद्धि हुँदा पुरुष, महिला र बालबालिका गरि दैनिक ७४ जनाको ज्यान गएको बीबीसीले उल्लेख गरेको छ ।

काश्मिरका बासिन्दाको दैनिकी सामान्य अवस्थामा फर्काउन संघीय सरकारलाई भारतको उच्च अदालतले आदेश दिएको छ । भारतले विशेषाधिकार खोसेपछि ४२ दिनयता विभिन्न प्रतिबन्ध झेलिरहेको कश्मिरलाई सामान्य अवस्थामा जतिसक्दो चाँडो फर्काउन अदालतले आदेश दिएको हो ।

मेक्सिकोको जलिस्कोमा एक ईनार भित्र ४४ वटा श'व फेला परेका छन् । ग्वाडालाजारा शहर बाहिर १ सय १९ वटा झोलामा क्षतविक्षत अवस्थामा ४४ जनाको श'व भेटिएको हो ।

अमेरिका र चीनको व्यापारिक तनावका कारण विश्वमा आर्थिक संकट निम्तिने विभिन्न अध्ययनलाई अन्तर्राष्ट्रिय मुद्रा कोषले अस्वीकार गरेको छ ।

अस्ट्रेलियाले कामदार अभावपूर्तिका लागि दुर्गम क्षेत्रलाई ध्यानमा राखेर आफ्नो अध्यागमन नियमलाई परिवर्तन गर्ने तयारी गरेको छ । अस्ट्रेलियाको रोजगार तथा सीप मन्त्री मिकइला क्यासले अहिले जारी रहेको दक्ष कामदार सूचीलाई समीक्षा गरिने बताउनुभयो । 

अंग्रेजीको सामान्य तीन शब्द ‘आर यु ओके ?’ अर्थात तिमी ठिकै छौं ? सुन्दा जति सामान्य लाग्छ यसको भित्री अर्थ उत्ति नै गहन छ । यही तीन शब्दको महत्वलाई अष्ट्रेलियाले विश्वब्यापी रुपमा जीवनबाट हरेस खाएकाहरुलाई जीवन जीउन प्रेरित गर्ने उद्देश्यका साथ फैलाउने कोशिस गरिरहेको छ । 

पाकिस्तानका प्रधानमन्त्री इमरान खानले आज पाकिस्तान प्रशासित कश्मीरको मुजफ्फराबादबाट सम्बोधन गर्नुहुने भएको छ । माइक्रो ब्लगिङ साइट ट्वीटरमार्फत जानकारी दिँदै प्रधानमन्त्री खानले  भारत प्रशासित कश्मीरका जनतामाझ पनि एकताको सन्देश दिने उद्देश्यले आजको कार्यक्रममा सहभागी हुन लागेको उल्लेख गर्नुभएको छ ।