संखुवासभाका दुर्गम भोटखोला गाउँपालिकाका ३ वटा मतदान केन्द्रका मतपेटिका सेनाको हेलिकप्टरबाट सोमबार सदरमुकाम खाँदबारी ल्याइएको छ । ३ दिनसम्म पैदल मार्ग हुँदै ल्याउनुपर्ने भएपछि चीनको सिमावर्ती किमाथांका, थुदाम र रिदाक मतदान केन्द्रका मतपेटिका सेनाको हेलिकप्टरबाट मतगणनास्थल खाँदबारी ल्याइएको हो ।

 मुख्य निर्वाचन अधिकृतको कार्यालयका अनुसार भोटखोला गाउँपालिकाको हटियागोलामा संकलन गरिएको मतपेटिका भने अझै ल्याइएको छैन । त्यहाँ भोटखोलाका ११ वटा मतदान केन्द्रको मतपेटिका संकलन गरिएको छ । भोटखोलाको च्याम्ताङ मतदान केन्द्रको टोली आएपछि मात्रै सबै मतपेटिका खाँदबारी ल्याईने छ ।

 मतगणना जिल्ला समन्वय समितिको सभाहलमा हुनेछ । च्याम्ताङ मतदान केन्द्रको मतपेटिका सोमबार राति ८ बजेसम्ममा हटिया गोलामा आइपुग्ने अनुमान गरिएको डीएसपी वीरेन्द्र गोदारले बताउनुभयो । १ सय ६४ मतदान केन्द्र मध्ये १ सय ५३ केन्द्रको मतपेटिका सदरमुकाम खाँदबारीमा संकलन भइसकेको छ । 

सबै मतदान केन्द्रको मतपेटिका आइसकेपछि मतगणना गरिनेछ । संखुवासभामा करीब ५६ प्रतिशत मत खसेको जिल्ला निर्वाचन कार्यालयले जनाएको छ । संखुवासभामा १ लाख १७ हजार ५ सय ५४ मतदाता रहेका छन् ।