गाउँपालिकाका अध्यक्षलाई साढे तीन वर्ष जेल
पुस १९, २०७९ | बाग्लुङ
बाग्लुङको निसीखोला गाउँपालिकाका अध्यक्ष सूर्यबहादुर घर्ती लागू औषध मुद्दामा दोषी ठहर भएका छन् ।
जिल्ला अदालत बाग्लुङका न्यायाधीश दिवाकर भट्टको इजलासले सोमबार घर्तीलाई दोषी ठहर गर्दै साढे तीन वर्षको जेल सजाए सुनाएको छ । उनलाई ५० हजार रुपैयाँ जरिवाना समेत तोकिएको छ ।
घर्ती हाल फरार रहेको बाग्लुङ प्रहरीले जनाएको छ । २०७७ असार १२ मा निसीखोला गाउँपालिका–६ का वडा अध्यक्ष हुँदा घर्ती ८० केजी गाँजा सहित घरबाटै पक्राउ परेका थिए ।
गाँजा भण्डारण गरेको आरोपमा ०७७ भदौ ४ मा उनी विरुद्ध मुद्दा परेको थियो । दुई वर्ष अघिनै झण्डै तीन महिना पुर्पक्ष बसेपछि उनी धरौटीमा रिहा भएका थिए ।
मुद्दा विचाराधिन अवस्थामा छँदै घर्ती गत बैशाखमा निसीखोला गाउँपालिकाको अध्यक्षमा निर्वाचित भएका थिए ।