मकवानपुरमा चिकित्सकमाथि कुटपिट गर्ने ४ जना पक्राउ
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2023/news/arrested-1694700639.jpg&w=700&height=600)
भाद्र २८, २०८० | काठमाडौं
मकवानपुरको हेटौंडास्थित सञ्चो अस्पतालका चिकित्सकमाथि कुटपिटमा संलग्न ४ जनालाई प्रहरीले नियन्त्रणमा लिएको छ । डाक्टरको लापरबाहीका कारण बिरामीको मृत्यु भएको आरोप लगाउँदै दुई जना चिकित्सकमाथि कुटपिट भएको थियो ।
घटनामा संलग्न रमा प्रधान, रमिता प्रधान, रोहित प्रधान र अनुप प्रधानलाई प्रहरीले पक्राउ गरेको हो । उनीहरु चारै जना मृतक राजेश प्रधानका परिवारका सदस्य हुन् । चिकित्सकमाथि कुटपिट भएको भिडियो सामाजिक सञ्जालबाट बाहिरिएपछि घटनालाई लिएर चौतर्फी आलोचना भएको थियो ।
घटनाको विरोधमा चिकित्सकले विरोधका कार्यक्रम घोषणा गरेपछि उनीहरुलाई प्रहरीले पक्राउ गरेको हो । हेटौंडा–१ स्थित सञ्चो अस्पतालका डा. विकास थापा र प्रशान्त विडारीमाथि हिजो बिरामी हेरिरहेकै समयमा कुटपिट भएको थियो । एक महिनाअघि डेंगी संक्रमित हेटौंडा–१२ का ४१ वर्षीय राजेश प्रधानको उपचारका क्रममा गत सोमवार चितवनस्थित चितवन मेडिकल कलेजमा उपचारको क्रममा मृत्यु भएको थियो ।
भदौ २२ गते सञ्चो अस्पतालमा भर्ना गरिएका प्रधानलाई सञ्चो अस्पतालका चिकित्सकले भदौ २३ गते चितवन मेडिकल कलेजमा रेफर गरेका थिए । भदौ २५ गते उनको मृत्यु भएपछि परिवारका सदस्यले हिजो सञ्चो अस्पतालका चिकित्सकमाथि कुटपिट गरेका हुन् ।