बर्दियाको बारबर्दियामा एक जना महिलाको हत्या भएको छ । बारबर्दिया नगरपालिका–५ तर्कापुरकी ३९ वर्षीया मिना थारुको गएराति हत्या भएको प्रहरीले जनाएको छ । 

धारिलो हतियार प्रहारबाट गम्भीर घाइते भएकी थारुलाई उपचारका लागि जिल्लाको जयनगरस्थित नगर अस्पतालमा लगिएको थियो । 

टाउको र घाँटीमा चोट लागेकी थारुको उपचारको क्रममा मृत्यु भएको जिल्ला प्रहरी कार्यालयका प्रहरी नायब उपरीक्षक डीएसपी तुल्सीराम अर्यालले जानकारी दिनुभयो । 

थारुको हत्यामा संलग्न रहेको अभियोगमा बारबर्दिया–११ जब्दीका ४० वर्षीय पप्पु भनिने शिव चौधरीलाई प्रहरीले पक्राउ गरेको छ । 

चौधरीलाई बारबर्दिया–५ सिटी बरेलीबाट गएराति नै पक्राउ गरिएको डीएपसी अर्यालले जानकारी दिनुभयो । हत्याका सम्बन्धमा प्रहरीले नियंत्रणमा लिई अनुसन्धान गरिरहेको जनाएको छ ।