चितवनमा बसको ठक्करबाट एकको मृत्यु
कार्तिक २१, २०८१
चितवनमा बसले मोटरसाइकललाई ठक्कर दिँदा एक जनाको मृत्यु भएको छ । दुई जना घाइते भएका छन् ।
रत्ननगर नगरपालिका–२ सब्जिमण्डीस्थित सडकमा बसले मोटरसाइकललाई ठक्कर दिँदा रत्ननगर–१३ अमिलियाका २१ वर्षीय सुनिल पौडेलको मृत्यु भएको जिल्ला प्रहरी कार्यालयले जनाएको छ ।
खैरहनीबाट टाँडीतर्फ आइरहेको बसले मोटरसाइकललाई ठक्कर दिँदा त्यसमा सवार तीन मध्ये गम्भीर घाइते पौडेलको चितवन मेडिकल कलेजमा उपचारका क्रममा मृत्यु भएको प्रहरीले जनाएको हो ।
सोही ठाउँका २० वर्षीय साहिल परियार र २१ वर्षीय सञ्जय लामाको चितवन मेडिकल कलेजमा उपचार भइरहेको छ । बस चालकलाई प्रहरीले नियन्त्रणमा लिएको छ ।
