एटलेटिको म्याड्रिडले उत्कृष्ट पुनरागमन गर्दै स्पेनीस ला लिगा फुटबलमा सेभिल्लालाई पराजित गरेको छ । घरेलु मैदानमा गएराति भएको खेलमा एटलेटिको म्याड्रिडले पाहुना टोली सेभिल्लाविरुद्ध ४–३ गोलको रोमाञ्चक जित निकालेको हो । 

रोड्रिगो डे पाउलले खेलको १० औं मिनेटमा गोल गर्दै म्याड्रिडलाई अग्रता दिएका थिए । तर, १२ औं मिनेटमा सेभिल्लाका लागि डोडी लुकेबाकियाले बराबरी गोल फर्काए । 

आइज्याक रोमेरोले ३२ औं र जुआनलु सान्चेजले ५७ औं मिनेटमा गोल गर्दै सेभिल्लालाई ३–१ को अग्रता दिलाए । तर, खेलको ६२ औं मिनेटमा एन्टोनी ग्रिजमन र ७९ औं मिनेटमा सामुएल लिनोले गोल गर्दै खेल ३–३ को बराबरीमा ल्याए । 

घरेलु टोलीका लागि ग्रिजमनले खेलको ९४ औं मिनेटमा गरेको गोल निर्णायक बन्यो । यो जितसँगै म्याड्रिड १६ खेलबाट ३५ अंकका साथ तालिकाको तेस्रो स्थानमा रहेको छ । सेभिल्ला १९ अंकसहित तालिकाको १३ औं स्थानमा रह्यो ।

अन्य खेलम एथलेटिको बिलबाओले भिल्लारियललाई २–० र रियल सोसिडाडले लेगानेसलाई ३–० गोलले हरायो । ओसासुना र डेपोर्टिभो एलाभेसले भने २–२ गोलको बराबरी खेलेका छन् ।