एनसेल पाँचौं टाइगर कप राष्ट्रिय तथा अन्तर्राष्ट्रिय क्लब भलिबल प्रतियोगितामा टिपटप न्यू डायमन्ड स्पोर्ट्स क्लबलाई हराउँदै आयोजक टाइगर ग्रुप अफ पोखरा महिलातर्फ क्वालिफायरमा प्रवेश गरेको छ । 

पोखरा रंगशालास्थित भलिबल कोर्टमा मंगलबार भएको खेलमा आयोजक टोलीले न्यू डायमन्डलाई ३–० को सोझो सेटमा पराजित गरेको हो । योसँगै महिला टोलीतर्फ विजेता समूहबाट आयोजक टोली र एपीएफ शीर्ष दुई स्थानमा रहँदै पहिलो क्वालिफायर खेल्ने टुंगो लागेको हो । 

पहिलो र दोस्रो स्थानको टुंगो भने लिगको अन्तिम खेलबाट लाग्नेछ । लिग चरणको एक खेल अगावै आयोजक टोलीले ३–३ अंक जोड्दै पहिलो क्वालिफायर खेल्ने टुंगो लागेको हो । सो समूहबाट दुवै खेलमा पराजित भएको न्यू डायमन्डले पराजित समूहबाट शीर्ष स्थानमा रहेको नेपाल पुलिस क्लबसँग एलिमिनेटरमा प्रतिस्पर्धा गर्नेछ ।

प्रतियोगिता अन्तर्गत महिलातर्फ नै मंगलबार त्रिभुवन आर्मी क्लबलाई हराउँदै नेपाल पुलिस क्लब एलिमिनेटरमा प्रवेश गरेको छ । आर्मीलाई ३–० को सोझो सेटमा पराजित गर्दै पुलिस महिलातर्फको एलिमिनेटरमा प्रवेश गरेको हो । 

पुलिसले पहिलो सेट २५–१८, दोस्रो सेट २५–२१ र तेस्रो सेट २५–१९ ले आफ्नो पक्षमा पार्‍यो । दोस्रो सेटमा १६–१० को आर्मीको अग्रतालाई उल्ट्याउँदै पुलिसले जित निकालेको थियो । अन्य सेटमा भने पुलिसले सहज जित निकाल्यो ।

पहिलो चरणमा पराजित समूहबाट ६ अंक जोडेर शीर्ष स्थानमा रहँदै पुलिस इलिमिनेटरमा प्रवेश गरेको हो । पुलिसले यसअघि थाइल्यान्डको ट्राभल इन्क्वायरी युनाइटेड प्यासन भलिबल क्लबलाई ३–१ को सेटमा हराएको थियो । महिलातर्फ आर्मी र ट्राभल इन्क्वायरी एक खेल अगावै प्रतियोगिताबाट बाहिरिएका छन् ।

पुलिसले अब विजेता समूहबाट तेस्रो स्थानमा रहने टोलीसँग एलिमिनेटर खेल्ने छ । विजेता समूहमा आयोजक टाइगर ग्रुप, एपीएफ र टिपटप न्यू डायमन्ड स्पोर्ट्स क्लब छन् । पहिलो क्वालिफायरमा पराजित हुने टोली र एलिमिनेटरमा विजयी हुने टोलीले फाइलन प्रवेशका लागि दोस्रो क्वालिफायरमा प्रतिस्पर्धा गर्ने छन् ।

गण्डकीसँग एपीएफ पराजित :

प्रतियोगिता अन्तर्गत मंगलबार पुरुषतर्फ गण्डकी प्रदेशले एपीएफलाई पराजित गरेको छ । गण्डकीले एपीएफफमाथि ३–१ सेटको जित दर्ता गराएको हो । पहिलो सेट २३–२५ ले गुमाएको गण्डकीले दोस्रो, तेस्रो र चौंथो सेटमा पुनरामगन गर्दै जित हासिल गर्न सफल रह्यो । गण्डकीले दोस्रो सेट २५–२०, तेस्रो सेट २५–१९ र चौंथो सेट २५–१५ ले आफ्नो पक्षमा पार्‍यो । अब गण्डकी र एपीएफले टिपटप हेल्प नेपाल स्पोर्ट्स क्लबसँग खेल्नेछन् । त्यसपछि शीर्ष स्थानमा रहने टोलीले एलिमिनेटर खेल्नेछ ।

आर्मीसँग पुलिसको हार :

मंगलबार नै पुरुषतर्फको अर्को खेलमा त्रिभुवन आर्मी क्लबले नेपाल पुलिस कलबलाई पराजित गरेको छ । आर्मीले पुलिसलाई ३–१ को सेटले पराजित गरेको हो । पहिलो सेट २५–१३ ले आफ्नो पक्षमा पारेको आर्मीले दोस्रो सेट २१–२५ ले पुलिसलाई सुम्पिएको थियो ।

तेस्रो सेट र चौंथो सेटमा पुनरागमन गर्दै आर्मीले खेल आफ्नो पोल्टामा पार्‍यो । आर्मीले तेस्रो सेट २५–१५ र चौंथो सेट २५–२२ ले जित हासिल गर्‍यो । पहिलो चरणबाट विजेता समूहमा अब आर्मीले बुधबार भारतको सुनिल भलिबल क्लबसँग प्रतिस्पर्धा गर्नेछ । यो समूहबाट शीर्ष दुईमा रहने टोलीले पहिलो क्वालिफायर खेल्नेछन् । तेस्रो स्थानमा रहने टोलीले एलिमिनेटर खेल्नेछ ।

प्रतियोगिताको पाँचौं दिन बुधबार लिग चरणका अन्तिम खेल हुनेछन् । महिला र पुरुषतर्फ दुई–दुई खेल हुने तालिका छ । पहिलो र दोस्रो खेल महिलातर्फको हुनेछ । पहिलो खेल प्रतियोगिताबाट बाहिरिसकेका ट्राभल इन्क्व्यारी प्यासन भलिबल क्लब थाइल्यान्ड र त्रिभुवन आर्मी क्लबबीच हुनेछ । प्रतिष्ठाका लागि हुने सो खेल बिहान पौने ९ बजेबाट सुरु हुनेछ ।

दोस्रो खेल पहिलो क्वालिफायर खेल्ने टुंगो लागेका एपीएफ र आयोजक टाइगर ग्रुप अफ पोखराबीच हुनेछ । यो खेलले पहिलो चरणबाट विजेता समूहको विजेता र उपविजेताको टुंगो लगाउने छ । उक्त समूहबाट तेस्रो हुँदै पुलिस एलिमिनेटरमा प्रवेश गरिसकेको छ ।

बुधबारको तेस्रो र चौंथो खेल पुरुषतर्फको हुनेछ । तेस्रो खेलमा टिपटप हेल्प नेपाल स्पोटर्स क्लब र एपीएफ भिड्नेछन् । चौंथो तथा अन्तिम खेल भारतको सुनिल भलिबल क्लब र त्रिभुवन आर्मी क्लबबीच हुनेछ । यसअघि आइतबार स्थगित भएको गण्डकी प्रदेश र हेल्प नेपालबीचको खेल बिहीबार हुने आयोजकले जनाएको छ ।