एमाले सचिव एवम् सांसद योगेश भट्टराईले पाथीभरा केबलकार निर्माणको विषयमा उत्पन्न विवाद वार्तामार्फत समाधान गर्न माग गर्नुभएको छ । ताप्लेजुङबाट निर्वाचित सांसद भट्टराईले काठमाडौंमा पत्रकार सम्मेलन गर्दै परिस्थितिलाई उत्तेजित बनाउने र सामाजिक सद्भाव भड्किने खालका गतिविधिले कसैको हित नगर्ने भन्दै अविलम्ब वार्ता गरी समस्यालाई समाधान गर्न माग गर्नुभएको हो । उहाँले विरोधमा उत्रिएका पक्षलाई बन्द हड्तालका कार्यक्रम फिर्ता लिन आग्रह गर्नुभएको छ । 

भट्टराईले गिरफ्तार भएका व्यक्तिहरु रिहा गर्न, घाइतेहरुलाई उपचारको व्यवस्था गर्न सरकारसँग माग समेत गर्नुभएको छ । स्थानीय संस्कृतिको जर्गेना र सम्वद्र्धनका लागि पार्क तथा संग्रहालय निर्माण गर्नुपर्ने तथा धर्म र संस्कृतिको उत्थानका लागि काम अघि बढाउनुपर्ने उहाँको भनाइ छ । ताप्लेजुङमा क्रियाशिल राजनीतिक दल तथा तीनै तहका जनप्रतिनिधिहरु पाथीभरामा केबलकार बन्नुपर्ने पक्षमा रहेको भन्दै सांसद भट्टराईले कम्पनीको तर्फबाट स्थानीय नागरिकलाई थप सुविधा दिनुपर्ने माग समेत गर्नुभयो ।