भारतको गुवाहाटीमा जारी टी–२० सिरिजको दोस्रो खेलमा नेपाल ‘ए’ ले आसामलाई ९६ रनले पराजित गरेको छ । 

नेपालले दिएको १ सय ७४ रनको लक्ष्य पछ्याएको आसाम १५ ओभर २ बलमा ७७ रनमा अलआउट भयो । आसामका रुहिनन्दन पेगुले सर्वाधिक १७ रन बनाउनु बाहेक अन्यले राम्रो स्कोर जोड्न सकेनन् । नेपालका लागि युवराज खत्रीले ४ तथा स्पीनर बसिर अहमदले ३ विकेट लिए । 

त्यसअघि टस जितेर पहिले ब्याटिङ गरेको नेपाल ए ले निर्धारित ओभरमा ७ विकेट गुमाएर १ सय ७३ रन बनाएको थियो । नेपालका लागि सन्दीप जोराले सर्वाधिक ३५ रन जोडे । यसअघि हिजो भएको पहिलो खेलमा नेपाल ‘ए’ आसामसँग १५ रनले पराजित भएको थियो । नेपाल ‘ए’ ले आसामसँग कुल ५ खेल खेल्नेछ ।