नापी कार्यालय भैरहवाका नापी अधिकृत सुग्रीव यादव विरुद्ध गैरकानूनी रुपमा सम्पत्ती आर्जन गरेको भन्दै भ्रष्टाचार मुद्दा दायर भएको छ ।

अख्तियार दुरुपयोग अनुसन्धान आयोगले आज यादव विरुद्ध ५ करोड बढी रकम माग दाबी गर्दै विशेष अदालतमा मुद्दा दायर गरेको हो । अख्तियारका अनुसार प्रतिवादी यादवले आफूभन्दा माथिल्लो निकाय र विभिन्न राजनीतिक व्यक्तिलाई प्रलोभनमा पारी विभिन्न दरबन्दी कायम गरेर सार्वजनिक जग्गा व्यक्तीको नाममा नामसारी गर्ने, प्लट मिलाउने जस्ता गतिविधि गरेको पाइएको छ ।

२०५३ असार १३ गते सरकारी सेवामा प्रवेश गरेका यादव र उनको परिवारले गत वर्ष असार १६ गतेसम्म ९ करोड ३ लाख रुपैयाँ आन्दानी गरेको तर यहि अवधिमा १४ करोड ८३ लाख रुपैयाँ खर्च गरेको पाइएको छ । अख्तियारको अनुसन्धानका क्रममा यादवले ५ करोड ७९ लाख रुपैयाँको स्रोत पुष्टि गर्न नसके पछि सो बराबरको रकम माग गर्दै विशेष अदालतमा मुद्दा दायर गरिएको हो ।

अख्तियारले यादव सहित उनको श्रीमती, छोरा र छोरीलाई समेत प्रतिवादी कायम गर्दै मुद्दा दायर गरेको सहयक प्रवक्ता गणेशबहादुर अधिकारीले जनाकारी दिनुभयो ।