कोरोना भाइरसको महामारीका कारण बेलायतका प्रधानमन्त्री बोरिस जोन्सनको आगामी साता हुने भनिएको भारत भ्रमण रद्द भएको छ । प्रधानमन्त्री जोन्सनले आगामी २५ अप्रिलदेखि भारत भ्रमण गर्ने तय भएको थियो । 

‘कोरोना महामारीका कारण सिर्जित पछिल्लो परिस्थितिलाई ध्यानमा राख्दै दुबै पक्ष बेलायतका प्रधानमन्त्रीको आगामी साता हुने भनिएको भारत भ्रमण स्थगत गर्ने निर्णयमा पुगेक छन्’ भारतको विदेश मन्त्रालयद्वारा जारी विज्ञप्तिमा भनिएको छ ।

साथै दुबै पक्षले आगामी दिनमा भर्जुअल बैठक मार्फत् भारत–बेलायत सम्बन्धलाई नयाँ ढंगले अगाडि बढाउनका लागि नयाँ कार्यक्रम ल्याइने समेत मन्त्रालयले जनाएको छ । कोरोना महामारीकै कारण देखाएर जोनसनको निर्धारित भारत भ्रमणलाई दिल्लीमै सीमित गरिएको थियो । 

यसअघि भारतको गणतन्त्रको दिवसको अवसरमा २६ जनवरीमा पनि बेलायतका प्रधामन्त्री जोन्सन दिल्ली आउने कार्यक्रम थियो । भारतले गणतन्त्रको दिवसको अवसरमा दिल्लीमा हुने विशेष कार्यक्रमका लागि प्रमुख अतिथिका रुपमा जोन्सनलाई निम्तो गरिएको थियो । तर, त्यतिबेला बेलायतमा कोरोना संक्रमण बढेको भन्दै जोन्सन आफैले भ्रमण रद्द गरेका थिए ।

भारतमा कोरोना संक्रमणले प्रत्येक दिन नयाँ रेकर्ड बनाइरहेको छ । आइतबार मात्र २ लाख ७३ हजारमा संक्रमण पुष्टि भएको थियो । त्यसैगरी १ हजार ६१९ जनाको मृत्यु भएको छ । जुन अहिलेसम्मकै बढी हो । 

संक्रमणले भयावह रुप लिएसँगै भारतको स्वास्थ्य क्षेत्र अस्तव्यस्त बनेको छ । कोरोना संक्रमण फैलनेक्रम तीव्र बनेपछि भारतको राजधानी दिल्लीमा सोमबार रातिदेखि लागू हुने गरी थप एक साताका लागि कर्फ्यु घोषणा गरिएको छ । 

दिल्ली सरकारले संक्रमण रोक्न भन्दै शनिबार र आइतबार पनि कर्फ्यु लागू गरेको थियो । त्यसैगरी दिल्लीमा गत ६ अप्रिलदेखि आगामी ३० अप्रिलसम्मका लागि घोषणा गरिएको रात्रीकालीन कर्फ्यु कायमै छ ।