सिभिल सेभिङ्स एण्ड क्रेडिट को–अपरेटिभ्सका बचतकर्ताको रकम ठगी गरेको आरोपमा पक्राउ परेका सिभिल ग्रुपका अध्यक्ष इच्छाराज तामाङसहित ४२ जना विरुद्ध काठमाडौं जिल्ला अदालतमा मुद्दा दायर भएको छ । 

प्रहरीको केन्द्रीय अनुसन्धान ब्यूरो सीआईबीको अनुसन्धान प्रतिवेदनको आधारमा जिल्ला सरकारी वकिलको कार्यालयले आज काठमाडौं जिल्ला अदालतमा मुद्दा दायर गरेको हो । तामाङसहित ४२ जनाविरुद्ध ५ अर्ब ६७ करोड ८० लाख ९० हजार ९ सय २ रुपैयाँ बिगो सहित ठगी र संगठित अपराधमा मुद्दा दायर भएको जिल्ला सरकारी वकिलको कार्यालयले जनाएको छ ।

तामाङलाई सीआईबीले गत असोज १८ मा प्रक्राउ गरेको थियो । उनीसहित १२ जना प्रक्राउ परेका छन् । सीआईबीसमक्ष हालसम्म २ सय १ वटा उजुरी परेका छन् । सिभिल सहकारीबाट १ हजार ५ सय २० जना ठगिएको प्रहरी अनुसन्धानबाट खुलेको छ । सरकारी वकिलको कार्यालयले तामाङसहितका अभियुक्तलाई अधिकतम सात वर्ष कैद, ७० हजार जरिवाना र पीडितलाई ठगिएको रकम भराउने मागदाबी गरेको छ । संगठित अपराध पनि ठहर भएमा उनीहरुमाथि थप ५० प्रतिशत कैद तथा जरिवाना हुनेछ । यस्तै जेष्ठ नागरिकमाथि ठगी गरेको भन्दै त्यसमा समेत थप सजाय माग गरिएको सरकारी वकिल कार्यालयले जनाएको छ ।