चितवनको भरतपुर महानगरपालिकामा चारवटा वडाहरुको मत गनेर सक्दा सत्तारुढ गठबन्धनले मेयर पदमा उठाएको माओवादी केन्द्रकी रेणु दाहाल र एमालेका विजय सुवेदीबीच तिब्र प्रतिस्पर्धा छ । चारवटा वडाको अन्तिम मत परिणाम आउँदा रेणु दाहाल विजय सुवेदीभन्दा २९ मतले अगाडी हुनुहुन्छ । पछिल्लो पटक मत गणना सकिएको वडा नम्बर चार एमालेका लागि उत्साहप्रद रहेन ।

अघिल्लो निर्वाचनमा रोचक प्रतिस्पर्धाबीच निकै कम भोटले यो वडामा एमालेले वडाध्यक्ष जितेको थियो । अहिले एमालेका उम्मेदवारलाई फराकिलो मतान्तरले पराजित गर्दै नेपाली काँग्रेसका अर्पण पोखरेल वडाध्यक्षमा विजयी हुनुभयो । एमालेले वडाध्यक्ष मात्रै गुमाएन मेयरको प्रतिस्पर्धामा संकट आउन सक्ने संकेत पनि यो वडाले दिएको छ । यो वडामा स्वतन्त्र उम्मेदेवार जगन्नाथ पौडेल र राष्ट्रिय प्रजातन्त्र पाटी (राप्रपा)को प्रभाव छ । राप्रपासँग नेकपा एमालेले मेयर उपमेयर पदमा चुनावी तालमेल गरेको छ । वडा नम्बर ४ मा एमालेका वडाध्यक्षले एक हजार ६ सय ३३ र राप्रपाका उम्मेदवारले ८ सय ८० मत ल्याएका छन् । एमाले र राप्रपाका वडाध्यक्षहरुको कुल दुई हजार ५ सय १३ मत पाएका छन् । तर मेयर पदमा विजय सुवेदीले यो वडामा जम्मा एक हजार ७ सय ४५ मत र उपमेयर पदमा राप्रपाकी हिमला गुरुङले एक हजार ५ सय ८२ मत ल्याउनुभएको छ । मेयर उपमेयरमा एमाले र राप्रपाबीच चुनाबी तालमेल भए पनि वडामा प्रभाव नपरेको पो हो कि भन्ने संकेत यसले दिएको छ । यो वडामा सत्तारुढ गठबन्धनबाट मेयर पदमा उम्मेदवार रहेकी रेणु दाहाललाई पनि तालमेल अनुरुपको मत आएको छैन । वडा नम्बर चारमा वडा तहमै सत्तारुढ दलबीच गठबन्धन थियो । यहाँ गठबनधनबाट नेपाली काँग्रेसका उम्मेद्वार अर्पण पोखरेल दुई हजार ५ सय १ मत ल्याएर विजयी हुनुभयो । तर गठबन्धनबाटै मेयर पदको उम्मेदेवार रहेकी रेणु दहाललाई यो वडामा केबल एक हजार ८ सय २४ मत आयो । बरु गठबन्धनबाटै उपमेयर पदका उम्मेद्वार रहेका नेपाली काँग्रेसका चित्रसेन अधिकारीलाई वडाध्यक्षको भन्दा आठ बढी दुई हजार ५ सय ९ मत आयो । यो वडामा मेयर पदमा स्वतन्त्र उम्मेदवार जगन्नाथ पौडेलले एक हजार २१६ मत ल्याउनुभयो । 

पौडेलले रेनु र सुवेदी दवैलाई जाने मत आफु तिर तानेको प्रष्ट छ । रेणुलाई जाने काँग्रेसको मत जगन्नाथले काट्ने र राप्रपासँग तालमेल गर्दा आउने मतले विजयी हुने योजना बनाएको एमालेलाई वडा नम्बर ४ ले दिएको यो संकेत सुखद छैन । कारण तालमेलमा रहेको राप्रपालेसमेत वडा नम्बर चारमा जसरी जगन्नाथलाई साथ दिए एमालेलाई मत अपुग हुने खतरा छ । चार नम्बर वडाको जस्तो मतको अवस्था रहे झिनो मतान्तरले अगाडी पछाडी रहेका रेणु र विजयमध्ये मेयरको रेस रेणुका लागि अनुकुल हुँदै जान सक्छ । अघिल्लो स्थानीय तह निर्वाचनमा भरतपुरका वडाहरुमा मेयरले पाएको मत र अहिलेको निर्वाचनको उतार चढाव नियाँली रहेका माओवादी केन्द्रका नेता सुर्दशन पौडेल प्रारम्भमा रेणु दाहालले झिनो मतले अगाडी पछाडी परे पनि भरतपुरको १२ नम्बर वडापछि मतान्तर बढाउँदै अग्रता लिने बताउँनुहुन्छ । १२ नम्बरपछिका वडाहरु सत्तारुढ गठबन्धनका लागि केही हदसम्म अनुकुल रहे पनि भरतपुरको १०, ११ र १२ नम्बर वडाबाट एमालेले मतान्तर बढाउन सक्ने आँकलन एमालेकै नेताहरुको रहेको छ ।

एमाले नेता कृष्णभक्त पोखरेलले भन्नुभयो , ‘१०, ११, १२ बाट हाम्रो मतान्तरमा राम्रै सुधार हुने अपेक्षा छ , त्यसपछिका कुनै कुनै वडा सत्तारुढ गठन्धनका लागि केही सजिला होलान तर प्रतिस्पर्धामा अहिले कै जस्तै उही निकै थोरै मतको मात्रै अन्तर रहने छ । पश्चिम तिर हाम्रो मत राम्रो भएका वडा पनि छन् । त्यसैले हामी सफल हुनेमा विश्वस्त छौं’