नेपालमा पहिलो पटक समलिंगी जोडीको विवाह दर्ता
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2023/news/smf-1701270220.jpg&w=700&height=600)
मंसिर १३, २०८०
नेपालमा पहिलो पटक समलिंगी जोडीको विवाह दर्ता भएको छ । लमजुङ स्थित दोर्दी गाउंपालिका २ अर्चलबोटको कार्यालयले मुलुकमा पहिलो पटक विवाह दर्ता गरेको हो । सर्वोच्च अदालतको अन्तरिम आदेश एवंम राष्ट्रिय पञ्जीकरण विभागको निर्देशन अनुसार वडा कार्यालयले विवाह दर्ता गरेको गाउंपालिका अध्यक्ष युवराज अधिकारीले बताउनुभयो ।
दोर्दी गाउंपालिका २ सल्लाबोटका माया गुरुङ भनेर चिनिने राम बहादुर गुरुङले नवलपरासीको कावासोती नगरपालिका ८ का सुरेन्द्र पाण्डेसंग सामाजिक परम्पार अनुसार विवाह गरेको अध्यक्ष अधिकारीले बताउनुभयो । समलिंगी विवाह नेपालमा मात्र नभएर सम्भवत दक्षिण एसियामै पहिलो पटक भएको अधिकारीको दावी छ ।
त्यस्तै गाउंपालिकाको समन्वयमा उनीहरुले राष्ट्रिय परिचयपत्र तथा पञ्जीकरण विभागमा निवेदन दिएपछि वडामै विवाह दर्ताको बाटो खुलेको थियो । विभागले सर्वोच्च अदालतको अन्तरिम आदेश अनुसार अस्थायी अभिलेख रहने गरी विवाह दर्ता गर्न निर्देशन दिएसंगै वडा कार्यालयमै विवाह दर्ता भएको हो ।