काठमाडौंको तीनकुने क्षेत्रमा गत शुक्रबार राजावादी समूहको हिंसात्मक घटनाबारे नेपाल प्रहरीले आफनो धारणा सार्वजनिक गरेको छ । आज आयोजित पत्रकार सम्मेलनमा प्रहरी प्रवक्ता दिनेशकुमार आचार्यले तीनकुने क्षेत्रमा उत्तेजित भिडलाई नियन्त्रणमा लिन गोली चलाउनुपर्ने स्थिति बनेको बताउनुभयो । प्रदर्शनकारीले त्रिभुवन विमानस्थल कब्जा गर्ने भन्दै अघि बढेपछि गोली चलाइएको उहाँको भनाइ थियोे ।

राजावादी समूहको सभा शुरु हुनुअघि नै अश्रूग्यास प्रहार गरी प्रहरीले विथोलेको भन्दै लगाइएको आरोपको प्रहरीले खण्डन गरेको छ । घटनालाई लिएर सामाजिक सञ्जालबाट भ्रामक सन्देश प्रवाह गर्ने प्रयास भएको प्रहरी प्रवक्ता आचार्यले बताउनुभयो ।

राजावादीको हिंसात्मक प्रदर्शनमा एक सञ्चारकर्मीसहित २ जनाको मृत्यु भएको थियो । यसैबीच, संसदको राज्य व्यवस्था तथा सुशासन समितिको बैठकमा बोल्दै राप्रपाका सांसद बुद्धिमान तामाङले राजावादीको प्रदर्शनमा आफू सहभागी भएपनि सभास्थलमा मेडिकल व्यवसायी दुर्गा प्रसाई र पूर्व राजा ज्ञानेन्द्र शाहको मात्र तस्वीर देखेपछि त्यहाँबाट फर्किएको बताउनुभएको छ । घटनाको दोष राप्रपालाई समेत दिन खोजिएको भन्दै सांसद तामाङले आपत्ति जनाउनुभयो ।