सञ्चार तथा सूचना प्रविधिमन्त्री पृथ्वीसुब्बा गुरुङले मन्त्रिपरिषद् पुनर्गठनको सम्भावना रहेको बताउनुभएको छ । सत्तारुढ दलहरूबीच सहमति जुटेमा मन्त्रीपरिषद् पुनर्गठन हुन सक्ने मन्त्री गुरुङले बताउनुभएको हो ।

 सञ्चार मन्त्रालयमा आयोजित पत्रकार सम्मेलनका क्रममा मन्त्री गुरुङले सत्ता साझेदार दलहरु एमाले र कांग्रेसबीच अविश्वासको अवस्था पैदा नभएको समेत बताउनुभयो ।

 यसैबीच, प्रधानमन्त्री केपी शर्मा ओली भूपरिवेष्ठित विकासशील राष्ट्रहरूको तेस्रो सम्मेलनमा भाग लिन आगामी आइतवार तुर्कमेनिस्तान जाने हुनुभएको छ । मन्त्रिपरिषदले प्रधानमन्त्री ओलीको भ्रमणलाई स्वीकृत गरेको हो । सो सम्मेलन साउन १८ देखि २१ सम्म हुँदैछ । 

प्रधानमन्त्रीको नेतृत्वमा सहभागिता जनाइने सो कार्यक्रममा प्रतिनीधिमण्डलको छनोट र एजेण्डाबारे छलफल भइरहेको परराष्ट्र मन्त्रालयले जनाएको छ ।