निर्वाचन आयोगको विश्वसनीयता माथि आँच आउने गरी भ्रामक प्रचार गरेको आरोपमा मेडिकल व्यवसायी एवं ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ का संयोजक दुर्गा प्रसाईं आज पोखराबाट पक्राउ परेका छन् । 

उनलाई पोखरा विमानस्थल नजिकैबाट कास्की प्रहरीले नियन्त्रणमा लिएको हो । प्रसाईंले नेपाली कांग्रेसको विशेष महाधिवेशन पक्षले निर्वाचन आयोगलाई ५२ करोड रुपैयाँ बुझाएर निर्वाचन नतिजा आफ्नो पक्षमा पारेको भन्दै एक भिडियो सार्वजनिक गरेका थिए ।

सोही विषयलाई लिएर आयोगले अनुसन्धानका लागि प्रहरीलाई पत्राचार गरेपछि उनलाई पक्राउ गरिएको कास्की प्रहरी प्रवक्ता डीएसपी हरिबहादुर बस्नेतले बताउनुभयो । 

निर्वाचन आयोगले प्रसाईंको अभिव्यक्तिले संवैधानिक निकायको प्रतिष्ठामा गम्भीर आघात पु¥याएको ठहर गर्दै कारबाहीका लागि नेपाल प्रहरीको दुईवटा युनिटलाई पत्राचार गरेको थियो । 

सामाजिक सञ्जाल मार्फत भ्रम फैलाएको विषयमा डिजिटल फरेन्सिक अनुसन्धानका लागि प्रहरीको साइबर ब्युरो र पक्राउ पुर्जी कार्यान्वयन र थप कानुनी प्रक्रिया अघि बढाउनका लागि जिल्ला प्रहरी परिसर, काठमाडौँलाई आयोगले पत्र पठाएको थियो । 

प्रसाईंले केही दिनअघि सार्वजनिक गरेको एक भिडियोमा कांग्रेसभित्रको आन्तरिक विवाद र निर्वाचनको प्रसङ्ग जोड्दै आयोगका पदाधिकारीहरूले मोटो रकम लिएर नतिजा हेरफेर गरिदिएको दाबी गरेका थिए । 

आयोगले सो दाबी पूर्णतः निराधार, भ्रामक र संस्थाको छवि धमिल्याउने नियतले आएको भन्दै गृह मन्त्रालय मार्फत प्रहरीलाई उजुरी गरेको थियो ।