होम आइसोलेशनमा बसेकी एक महिलाको मृत्यु
वैशाख २२, २०७८ | काँकडभिट्टा
कोरोना भाइरस संक्रमण पुष्टि भएपछि होम आइसोलेशनमा बसेका झापाकी एक महिलाको मृत्यु भएको छ । कोरोना संक्रमणबाट मेचीनगर नगरपालिका–६ बर्मेली निवासी ५६ वर्षीयाको महिलाको आज बिहान मृत्यु भएको हो ।
ती महिलालाई चार दिन अघि कोरोना पोजेटिभ देखिएको थियो । उनी कलेजोको क्यान्सर रोगबाट पीडित थिइन् । उनको उपचारका लागि बीएण्डसी अस्पताल लगिएकोमा पीसीआर परीक्षण गराउँदा कोरोना पोजेटिभ देखिएको थियो ।
कोरोना संक्रमण देखिएपछि उनी गत शुक्रबारदेखि होम आइसोलेशनमा बस्दै आएकी थिईन् ।