पूर्व पश्चिम राजमार्गस्थित कपिलवस्तुको बुद्धभूमि नगरपालिका–४, झडुलामाई मन्दिर घुम्ती नजिक सवारी दुर्घटना हुँदा एक जनाको मृत्यु भएको छ । 

यात्रु बसले आँप बोकेको जिपलाई ठक्कर दिँदा शिवराज नगरपालिका–६ बस्ने ३३ वर्षीय हिरालाल बढईको मृत्यु भएको हो । 

मंगलबार बिहान साढे ५ बजेतिर काठमाडौंबाट सुर्खेत जाँदै गरेको क.प्र.०२–००१ ख ०५२५ नम्बरको बस र चन्द्रौटाबाट बुटवल आउँदै गरेको लु १ च ९२८४ नम्बरको जिप आपसमा ठोकिएको थियो । 

जिप चालक शिवराज–६ का बढईको घटनास्थलमा मृत्यु भएको जिल्ला ट्राफिक प्रहरी कार्यालयका निरीक्षक अनिस भण्डारीले बताउनुभयो । दुर्घटनापछि गाडीले च्यापिएका चालक बढईको २ घण्टापछि बल्ल उद्धार गरिएको थियो । 

जिपका सहचालक र बसका ८ घाइतेको गोरुसिंगेस्थित निजी क्लिनिकमा उपचार भईरहेको प्रहरीले जनाएको छ । उनीहरुको अवस्था सामान्य छ ।