पहिरोले मध्यपहाडी लोकमार्गमा ट्रक पुरियो
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2024/third-party/abarudda2sindhuli-1718768890.jpg&w=700&height=600)
असार ५, २०८१ | सिन्धुली
मध्य पहाडी लोकमार्ग अन्तर्गत सिन्धुलीको गोलन्जोर गाउँपालिका–१ को कुँडुलेमा पहिरो खस्दा एउटा ट्रक पुरिएको छ । बुधबार बिहान लेदोसहित खसेको पहिरोले ट्रक पुरिए पनि मानवीय क्षति भने नभएको प्रहरीले जनाएको छ ।
लेदो सहितको पहिरो खस्दा प्रदेश–२ –०३–००१ ख– ७१४४ नम्बरको ट्रक पुरिएको हो । प्रहरीका अनुसार चालक पर्साको परवानीपुरका २५ वर्षीय रोशन पटेल सकुशल रहेका छन् ।
लगातारको वर्षापछि खसेको पहिरोका कारण खुर्कोट–घुर्मी खण्डको कुँडुलेमा यातायात सेवा अवरुद्ध भएको छ । सडक अवरुद्ध हुँदा पूर्वी पहाडी जिल्ला ओखलढुङ्गा, खोटाङ, सोलुखुम्बु, भोजपुर, उदयपुरबाट काठमाडौं आवतजावत गर्ने सवारी साधन बाटोमै रोकिएको प्रहरीले जनाएको छ ।
यान्त्रिक कार्यालय मुलकोटबाट जेसीबी मगाएर पहिरो पन्छाउने काम भइरहेको सिन्धुलीका प्रहरी उपरीक्षक एसपी गोविन्दराज काफ्लेले जानकारी दिनुभयो । सोही मार्ग अन्तर्गत गोलन्जोर–६ को अक्करे भीरमा समेत लेदो माटो खसेर सडक अवरुद्ध बनेको छ ।