तिनाउ नदीमा डुबेर दुई बालकको मृत्यु
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2024/default/Radio-1711255025.jpg&w=700&height=600)
श्रावण १२, २०८१ | तिलोत्तमा
तिनाउ नदीमा डुबेर रुपन्देहीमा दुई जना बालकको मृत्यु भएको छ । बुटवल उपमहानगरपालिका-१ सिर्जनानगरस्थित आफन्तको घरमा आएका दुई बालकको नदीमा डुबेर मृत्यु भएको बुटवलस्थित इलाका प्रहरी कार्यालयले जनाएको छ ।
बुटवल-१ सिर्जनानगरस्थित सानी आमाको घरमा आएका दुई बालक नदीमा पौडी खेल्ने क्रममा बगेका थिए ।
नदीमा बगेका मध्ये बाग्लुङको बरेङ गाउँपालिकाका १२ वर्षीय विवश खत्रीको शव शुक्रबार साँझ नदी छेउमा भेटिएको इलाका प्रहरी कार्यालयका प्रहरी नायब उपरीक्षक विजयराज पण्डितले जानकारी दिनुभयो ।
रुपन्देहीको सैनामैना नगरपालिकाका ८ वर्षीय विप्रन पाण्डेको शव शनिबार बिहान तिलोत्तमाको गोरकटवा नजिक नदीमा फेला परेको प्रहरीले जानकारी दिएको छ ।
पौडी खेल्न गएका दुई जनालाई नदीले बगाएपछि स्थानीयले प्रहरीलाई खबर गरेका थिए । तिनाउ नदीमा बगेका दुवै बालक दिदी बहिनीका छोरा हुन् ।