राष्ट्रिय स्वतन्त्र पार्टी रास्वपाका सभापति रवि लामिछाने पार्टीको नियमित काममा फर्किनुभएको छ । 

पछिल्लो राजनीतिक गतिविधि, सदनको कामकारबाही लगायत पार्टीको आगामी रणनीति बनाउन बसेको केन्द्रीय समितिको बैठकमा लामिछाने सहभागी हुनुभएको हो । यसैबीच, काठमाडौंको वनस्थलीस्थित पार्टी कार्यालयमा बोल्दै सभापति लामिछानेले अदालतको प्रारम्भिक आदेशलाई गलत व्याख्या गरेर आफ्नो अपमान गरिएको टिप्पणी गर्नुभयो ।

आफूविरुद्ध सरकारले गलत ढंगमा कारवाही प्रक्रिया अघि बढाएको लामिछानेको भनाइ थियो । सभापति लामिछानेले एउटा अदालतमा मुद्धा अघि नबढाएर सरकारले दवावमा राख्न खोजेको टिप्पणी गर्नुभयो ।

सहकारी ठगी र सम्पत्ति शुद्धिकरणसम्बन्धि मुद्दामा कानूनी प्रक्रिया अघि बढेपछि लामिछानेले पार्टीको जिम्मेवारी स्थगन गर्नुभएको थियो । लामिछानेविरुद्ध सम्पत्ति शुद्धीकरण कसुरमा समेत अभियोगपत्र दर्ता भएपछि पुस ८ मा डोलप्रसाद अर्यालले कार्यवहाक सभापतिको जिम्मेवारी सम्हाल्नुभएको थियो ।