भरुवा बन्दुक र गाँसहित पाँच जनालाई जिल्ला प्रहरी कार्यालय मकवानपुरले पक्राउ गरेको छ । प्रहरीले विशेष सूचनाको आधारमा सुरक्षाजाँचका क्रममा राक्सिराङ गाउँपालिका–७ का २० वर्षीय सर्गलाल प्रजाको घरबाट लागूऔषध गाँजा ७८ केजी गाँजासहित एक थान भरुवा बन्दुक बरामद गरेको हो ।

उनको घरबाट प्रहरीले सानो व्याट्री तीन थान, स–साना ढुङ्गाका टुक्रा २५ वटा, एक सय एमएलको आल्मुनियम बोतलमा बारुद्ध तथा एकथान रोल पटका बरामद गरेको थियो । 

यसैगरी, सोही स्थानका ४५ वर्षीय चन्द्रबहादुर चेपाङसहित उनको घरबाट ६१ केजी गाँजा र एकथान भरुवा बन्दुक प्रहरीले बरामद गरेको जनाएको छ । जिल्ला प्रहरी कार्यालय मकवानपुरका अनुसार प्रहरीले आइतबार साँझ ४५ केजी गाँजासहित थप तीन जनालाई पक्राउ गरेको छ ।

उहाँका अनुसार डब्लुबी ०६–६३०९ नम्बरको भारतीय कारमा हेटौंडाबाट वीरगञ्जतर्फ गाँजा लैजाँदै गरेको अवस्थामा उनीहरुलाई पक्राउ गरेको हो । पक्राउ पर्नेमा भारतको बिहारस्थित भगलपुरका ३० वर्षीय विष्णकुमार शाह, ३० वर्षीया रेणुदेवी र २८ वर्षीय अहमद गुल्जार रहेका छन् ।

प्रहरीले पूर्व पश्चिम राजमार्ग अन्तर्गत हेटौंडा–१५ स्थित रातोमाटेमा नियमित सुरक्षाजाँचको क्रममा भारतीय नम्बर प्लेटको गाडीमा डिक्किभित्र फल्स बटम बनाएर गाँजा लुकाएर भारततर्फ लैजान लागेको अवस्थामा पक्राउ गरेको हो ।