मकवानपुर गोल्डकपको उपाधी एपीएफलाई
माघ २७, २०८० | मकवानपुर
मकवानपुर गोल्डकप फुटबल प्रतियोगिताको उपाधि विभागीय टोली एपीएफ क्लबले जितेको छ ।
हेटौंडा–६ स्थित गौरीटार रंगशालामा आज भएको फाइनलमा टाइब्रेकरमा न्युरोड टीम एनआरटीलाई ५–४ गोल अन्तरले पराजित गर्दै एपीएफ च्याम्पियन भएको हो ।
खेलको निर्धारित समय गोलरहित बराबरीमा टुंगिएको थियो । विजेता एपीएफले १५ लाख रुपैयाँ पुरस्कारसहित ट्रफी प्राप्त गरेको छ ।
उपविजेता एनआरटीले १० लाख रुपैयाँ प्राप्त गर्यो । मकवानपुर जिल्ला फुटबल संघले आयोजना गरेको प्रतियोगितामा १२ टोलीको सहभागिता थियो ।
महर्जनले पाए बुलेट बाइक
एपीएफका फरवार्ड अनिष महर्जनले प्रतियोगिताको सर्वोत्कृष्ट खेलाडी घोषितहुँदै उनले बुलेट मोटरसाइकल प्राप्त गरेका छन् ।
करिब ५ लाख रुपैयाँ बराबरको मोटरसाइकल प्राप्त गर्दा उनी खुशीले गदगद भएका थिए । केही महिना अगाडिदेखि मात्रै एपीएफमा अनुबन्धित भएका उनले प्रतियोगितामा दुई गोल गरेका थिए । उनी हेटौंडाकै हुन् । पर्शुराम गौतम स्मृति प्रतिष्ठानले सर्वोत्कृष्ट खेलाडीका लागि प्रायोजन गरेको थियो ।
आयोजकले वर्षेनी सर्वोत्कृष्ट खेलाडीलाई बुलेट बाइक प्रदान गर्दै आइरहेको छ ।