नेपाली पारा तेक्वान्दो खेलाडी पलेशा गोवर्धनले छैटौं अन्तर्राष्ट्रिय पदक जितेकी छन् । 

पछिल्लो पटक पलेशाले मलेसियामा जारी १० औं एसियाली पारा तेक्वान्दो च्याम्पियनसिपमा कास्य पदक जित्दै आफ्नो अन्तर्राष्ट्रिय पदकको संख्या ६ वटा पु¥याएकी हुन् । युथ एशियन गेम र एशियली पारा ओलम्पिक्समा स्वर्ण जितेकी पलेशाले पेरिस पारा ओलम्पिक्स, एशियन गेम र एशियन च्याम्पियनसिपमा कास्य हात पारेकी थिइन् । 

उनी नेपालको लागि ओलम्पिक्सबाट पदक जित्ने पहिलो नेपाली खेलाडी पनि हुन् । नेपाल तेक्वान्दो संघका अनुसार मलेसियामा आयोजित एसियाली पारा तेक्वान्दो च्याम्पियनसिपको के–४४ क्याटगोरीको सेमिफाइनलमा पलेशा चीनकी ली युज्जीसँग पराजित भइन् । लीले पलेशालाई पहिलो राउन्डमा ४–० र दोस्रो राउन्डमा १०–० ले पराजित गरिन् । यसअघि उनले क्वाटरफाइनलमा उज्वेकिस्तानकी जुराएभा कमोलालाई २३–६ ले हराएकी थिइन् । यसैबीच, च्याम्पियनसिपमा सहभागी नेपालका अन्य खेलाडी भरत सिंह महता, अमिर ब्लोन, कामना प्रसाई र रेणु तामाङ भने पहिलो चरणबाटै बाहिरिएका छन् ।

 पलेसाको पछिल्लो सफलतासँगै पारा तेक्वान्दोमा प्रशिक्षक कविराज नेगी लामाको प्रशिक्षणमा नेपालको अन्तराष्ट्रिय पदक संख्या १२ पुगेको छ । उनको नेतृत्वमा नेपाली पारा तेक्वान्दोबाट ३ स्वर्ण, २ रजत र ७ कास्य पदक जितेको हो ।