नेपालले अगामी वर्ष इंग्ल्याण्डमा आयोजना हुने टी–ट्वान्टी महिला विश्वकप क्रिकेटको ग्लोबल छनोट आयोजना गर्ने भएको छ । 

अन्तर्राष्ट्रिय क्रिकेट परिषद् आइसिसीले आज विश्वकपको ग्लोबल छनोट आगामी वर्ष जनवरी १२ देखि फेब्रुअरी २ सम्म नेपालमा आयोजना हुने जनाएको हो । ग्लोबल छनोटमा सहभागी १० टोलीलाई दुई समूहमा विभाजन गरिनेछ । हरेक समूहका शीर्ष ३ टोली सुपर सिक्समा पुग्नेछन् । सुपर सिक्सको शीर्ष ४ मा रहने टोलीले विश्वकपमा स्थान बनाउने छ । प्रतियोगिताको खेल तालिका भने केही समयमै घोषणा गरिने आइसिसीले जनाएको छ ।

बंगलादेश र आयरल्याण्डले २०२४ मा आईसीसी महिला विश्वकपमा सहभागिता जनाएका कारण यी दई स्वतः छनोट भएका छन् । एसिया छनोटबाट थाइल्याण्ड र नेपाल, अमेरिका क्षेत्रिय छनोटबाट अमेरिकाले ग्लोबल छनोटमा स्थान बनाएका छन् । बाँकी पाँच स्थानका लागि अफ्रिका र युरोपबाट समान २ र पूर्वी एसिया–प्रशान्त क्षेत्र छनोटबाट १ टोलीले स्थान बनाउने छन् । नेपालले एसियाली छनोटको दोस्रो स्थानमा रहँदै पहिलो पटक ग्लोबल छनोटमा स्थान बनाएको हो । इंग्ल्याण्ड र वेल्समा हुने आईसीसी महिला टी–ट्वान्टी विश्वकप २०२६ को तालिका पहिले नै जारी भइसकेको छ । विश्वकप २०२६ जुन १२ देखि जुलाई ५ सम्म हुनेछ ।