आगामी फागुन २१ गते हुने प्रतिनिधि सभा सदस्य निर्वाचनका लागि मनोनयन दर्ता गरेका ४९ जनाले उम्मेदवारी फिर्ता लिएका छन् । माघ ६ गते उम्मेदवारी दर्ता गरेकामध्ये स्वतन्त्र र विभिन्न दलबाट गरी ४९ जनाले उम्मेदवारी फिर्ता लिएको निर्वाचन आयोगले जनाएको छ ।

आयोगले आज दिउँसो १ बजेसम्म उम्मेदवारी फिर्ता लिने समय तोकेको थियो । १ सय ६५ वटै निर्वाचन क्षेत्रमा ६८ वटा राजनीतिक दल र स्वतन्त्र गरी ३ हजार ४ सय ८७ जनाले उम्मेदवारी दिएका थिए । 

उम्मेदवारी फिर्ता लिनेमा ४५ जना पुरुष र ४ जना महिला छन् । आयोगका अनुसार नागरिक उन्मुक्ति पार्टी नेपालका रेशम चौधरीको उम्मेदवारी खारेज भएको छ । उम्मेदवारी फिर्ता गर्ने धेरैजसोले राजीखुसी फिर्ता गरेको उल्लेख गरेका छन् । 

यसैबीच, प्रगतिशील लोकतान्त्रिक पार्टीका संरक्षक एवम् पूर्व प्रधानमन्त्री बाबुराम भट्टराईले पनि उम्मेदवारी फिर्ता लिनुभएको छ । गोरखा क्षेत्र नम्बर २ बाट उम्मेदरवारी दिएका भट्टराईले आज आफ्नो उम्मेदवारी फिर्ता लिनुभएको हो । 

दलगत राजनीतिबाट माथि उठेर आगामी दिनमा बन्ने सरकारलाई सहयोग गर्न विभिन्न दल र व्यक्तिको सुझावपछि आफू निर्वाचन नलड्ने निर्णयमा पुगेको भट्टराईको भनाइ छ । 

दलगत राजनीतिमा रहँदा संकुचित हुने तथा राष्ट्रियताको सवालमा आफ्नो भूमिका कमजोर हुने देखिएपछि उम्मेदवारी फिर्ता लिएको पूर्व प्रधानमन्त्री भट्टराईको दावी छ ।

 मुलुकलाई अवश्यक परेको खण्डमा सहयोग गर्ने प्रतिबद्धतासहित निर्वाचनको प्रतिस्पर्धाबाट अलग भएको उहाँले बताउनुभयो । प्रमुख दलका शीर्ष तहका नेताले पुनः सांसद् बन्न निर्वाचनमा होमिएका बेला पूर्व प्रधानमन्त्री भट्टराईले भने अन्तिम समयमा आएर उम्मेदवारी फिर्ता लिनुभएको हो । पूर्व प्रधानमन्त्री केपी शर्मा ओली, पुष्पकमल दाहाल र माधवकुमार नेपाल चुनावी प्रतिस्पर्धा हुनुहुन्छ ।