राष्ट्रिय स्वतन्त्र पार्टी रास्वपाका सभापति रवि लामिछानेले आफ्नो निलम्बित सांसद पद फुकुवा गर्न प्रतिनिधिसभाका सभामुख देवराज घिमिरेलाई आग्रह गर्नुभएको छ । सम्पत्ति शुद्धीकरणसम्बन्धी मुद्दाको पुरक अभियोगपत्र दर्ता भएसँगै गत पुस ८ गते लामिछानेको पदबाट निलम्बन भएको थियो । पार्टीको नियमित काममा फर्किएको भोलिपल्ट सभापति लामिछानेले सभामुख घिमिरेलाई भेटेर आफ्नो निलम्वन हटाउन आग्रह गर्नुभएको हो ।

सभामुखको सचिवालयका एक सदस्यका अनुसार लामिछानेले गरेको आग्रहमा सभामुख घिमिरेले सो बिषयमा आफूले कानुनी परामर्श गरिरहेको जानकारी गराएको थियो । कास्की जिल्ला सरकारी वकिलको कार्यालय र जिल्ला प्रहरी कार्यालयले लामिछानेविरुद्ध सम्पत्ति शुद्धीकरण सम्बन्धी मुद्दाको पूरक अभियोगपत्र दर्ता भएको स्मरण गराउँदै सभामुख घिमिरेले निलम्वन हटाउन नमिल्ने धारणा राखेको बुझिएको छ । रास्वपा सभापति लामिछाने काठमाडौ, कास्की, रुपन्देही र चितवन जिल्लामा दर्ता भएका मुद्दाहरूमा धरौटी राखेर विभिन्न मितिमा रिहा हुनुभएको थियो । तर पर्साको सहकारी ठगीबारे परेको उजुरी अनुसन्धानका क्रममा रहेको बताइन्छ । यसैबीच, संसद सचिवालय परिसरमा सञ्चारकर्मीसँग कुराकानी गर्दै लामिछानेले पर्सा जिल्लामा अनुसन्धानमा गरिएको ढिलाइप्रति असन्तुष्टी जनाउनुभएको छ ।

गत कात्तिकमा सहकारी ठगी लगायत आरोपमा पक्राउ परेका लामिछाने धरौटी बुझाएर रिहा भएको केही समयपछि पार्टीको काममा फर्किनुभएको हो । एउटा व्यक्तिको पछाडी राज्य लागेको टिप्पणी उहाँले गर्नुभयो ।

संसदको चौथो ठूलो दल रास्वपाका सभापति लामिछाने पार्टीका संसदीय दलको नेता समेत हुनुहुन्छ ।