पछिल्लो समय काठमाडौंसहित मुलुकका मुख्य शहरमा वायु प्रदुषण बढ्दै जाँदा जनजीवन प्रभावित हुन थालेको छ । वायु प्रदुषणका कारण स्वास्थ्यमा प्रतिकुल समस्या देखिन थालेको हो । काठमाडौंमा सास फेर्नै सकस हुन थालेको सर्वसाधारणको गुनासो छ । २ सय ४९ एक्यूआईसहित काठमाडौं शहर आज विश्वकै दोस्रो प्रदुषित शहरमा दर्ज भएको छ ।

वायु प्रदुषण अस्वस्थ्यकर बन्दै जाँदा आखा रातो हुने नाक घाटी पोल्ने सास फेर्न समस्या हुने जस्ता लक्षण लिएर स्वास्थ्य संस्था पुग्नेहरुको संख्या बढ्न थालेको हो । स्वास्थ्य समस्या खेपी रहेकालाई वायुप्रदूषणका कारण बाहिर निस्कन झन समस्या भएको छ । प्रदुषणले मुटु रोगी, दम, फोक्सो र उच्च रक्तचाप भएका बिरामीलाई झन गाह्े बनाउने सिभिल अस्पतालका मेडिकल निर्देशक डा. विदेश विष्टले बताउनुभयो । दूषित हावामा सास फेरिरहदा यसले दीर्घकालीन रुपमा फोक्सोसम्बन्धी रोगहरु निम्तिने उहाँको भनाइ छ । 

काठमाडौँ उपत्यकासहित अधिकांश स्थानमा धुलो र धुवाँसहितको तुवाँलोले वातावरण प्रदूषित बनेको छ । बढ्दो तापत्रकम र सुक्खा मौसमका कारण मुलुकभर प्रदुषण बढ्दै गएको मौसम विभागले जनाएको छ । नेपालको वायुमा कार्बनमोनोअक्साइड, ओजोन, नाइट्रोजन, सल्फरडायोअक्साइड जस्ता अस्वस्थकर ग्याँस तथा धुलोका कणको मात्रा उच्च रहेको वायुप्रदूषण सूचकमा देखिएको छ । वातावरण विभागले वायुप्रदूषण अस्वस्थ्यकर बन्दै गएकाले सावधानी अपनाउन सर्वसाधारणमा आग्रह गरेको छ । आगामी जेठसम्मै वायु प्रदुषण उच्च हुने भन्दै विभागले विशेषगरी बालबालिका, बृद्ध, मुटु तथा श्वासप्रश्वासका रोगी र गर्भवती महिलालाई विशेष सावधानी अपनाउन आग्रह गरेको छ । त्यस्तै विभागले यो समयमा प्रदुषण बढाउने क्रियाकलाप नगर्न समेत अपिल गरेको छ ।