जितपुर सिमरा गोल्डकप फुटबल प्रतियोगिताको १५ औं संस्करण पर्सि शुक्रबारदेखि आयोजना हुने भएको छ । नव जनजागृति युवा क्लबको आयोजनामा हुने प्रतियोगिताको सम्पूर्ण तयारी पूरा भएको छ । प्रतियोगिताका सबै खेल सिमरा मैदानमा हुनेछ । 

आयोजक क्लबका अध्यक्ष रामचन्द्र लामाका अनुसार प्रतियोगितामा ८ टिम सहभागी हुँदैछन् । प्रतियोगितामा साविक विजेता नेपाल पुलिस क्लबसहित मच्छिन्द्र फुटबल क्लब, फ्रेण्ड्स क्लब, हिमालयन शेर्पा क्लब, चितवनको भरतपुर फुटबल क्लब, सिरहाको सलहेश युवा क्लब, मकवानपुर जिल्ला फुटबल संघ र आयोजक नव जनजागृति युवा क्लबको सहभागिता रहने आयोजकले जनाएको छ । 

अरु अरु ठाउ“मा ए डिभिजन क्लबहरुको खेल भइरहेकोले त्यसबाट प्रभावित भई यस वर्षको प्रतियोगिता ढिलो हुन गएको अध्यक्ष लामाले बताउनुभयो । ‘समय अभाव र आर्थिक स्रोतको कमीले यस वर्षको प्रतिगोगितामा ८ वटा टिमलाई मात्र सहभागिता गराइने छ,’ उहाँले भन्नुभयो, ‘यो भन्दा पहिले १० टीम सहभागी हुँदै आएको थियो ।’

प्रतियोगिताको विजेताले १० लाख तथा उपविजेताले ५ लाख रुपैयाँ प्राप्त गर्नेछन् । सर्वोत्कृष्ट खेलाडीलाई पुरस्कारको रुपमा एक थान विद्युतीय स्कूटर दिइने आयोजकले जनाएको छ । 

यसैगरी, उत्कृष्ट प्रशिक्षक, उत्कृष्ट गोलरक्षक र उच्च गोलकर्ताले जनही २५ हजार रुपैयाँ पाउने आयोजक क्लबका अध्यक्ष लामाले जानकारी दिनुभयो । इमर्जिङ खेलाडीलाई १५ हजार र प्रत्येक खेलका म्यान अफ दी म्याचले १० हजार रुपैयाँ प्राप्त गर्नेछन् ।