काठमाडौं उपत्यकामा वायुप्रदूषणको अवस्था आज पनि अस्वस्थ्यकर देखिएको छ । आईक्यू एअरका अनुसार काठमाडौंको वायु गुणस्तर आज ३ सय ४८ ए–क्यू–आई पुगेको हो । भोलिदेखि भने हावा चल्ने भएकाले विस्तारै आकाश खुल्ने मौसम विभागको अनुमान छ ।

काठमाडौंमा तत्कालै पानी पर्ने सम्भावना भने नरहेको विभागले जनाएको छ । यसैबीच, स्वास्थ्य तथा जनसंख्या मन्त्रालयले उपत्यकामा वायु प्रदूषण बढेसँगै उच्च सतर्कता अपनाउन सबैलाई आग्रह गरेको छ । मन्त्रालयले आज प्रेस विज्ञप्ति जारी गर्दै केही दिनदेखि नेपाल अत्यधिक प्रदूषित देशको सूचीमा परेकाले सतर्कता अपनाउन अनुरोध गरेको हो ।

मन्त्रालयका प्रवक्ता डा. प्रकाश बुढाथोकीले संवेदनशील समूहमा पर्ने बालबालिका, वृद्धवृद्धा, गर्भवती तथा दीर्घरोगीलाई विशेष सतर्कता अपनाउन सुझाव दिनुभयो । स्वास्थ्य मन्त्रालयले अत्यावश्यक कामबाहेक घरबाहिर ननिस्कन, यात्रा गर्दा अनिवार्य रूपमा मास्क लगाउन र अत्यधिक प्रदूषण भएका क्षेत्रमा नजान सर्वसाधारणमा अनुरोध गरेको छ ।