आईसीसी यू–१९ विश्वकप २०२६ अन्तर्गत एसिया छनोटको तयारीमा रहेको नेपाली यू–१९ टोलीलाई अफगानिस्तानको युवा टोलीले १ सय ३० रनले पराजित गरेको छ ।

मुलपानीस्थित क्रिकेट मैदानमा अफगानिस्तानले दिएको ३ सय १ रनको लक्ष्य पछ्याएको नेपाल ४६ ओभर २ बलमा १ सय ७० रनमा अलआउट भयो ।

नेपालका लागि ओपनिङ ब्याटर निरजकुमार यादवले ५३ रन बनाए भने सन्तोष यादव र अशोक धामीले २४–२४ रन जोडे । त्यसअघि टस जितेर पहिले ब्याटिङ गरेको अफगानिस्तानले निर्धारित ओभरमा ९ विकेटको क्षतिमा ३ सय रन बनाएको थियो ।

विश्वकप छनोटको तयारी स्वरुप नेपालले अफगानिस्तानसँग तीन खेलको सिरिज खेलेको हो । सिरिज अन्तर्गतको दोस्रो खेल आगामी आइतबार हुनेछ ।