अन्तर्राष्ट्रिय रेडक्रस महासंघले नेपाल रेडक्रस सोसाइटीका अध्यक्षसहित पाँच जना पदाधिकारीलाई बर्खास्त गरेको छ । 

संस्थाको अन्तराष्ट्र्रिय मान्यताविपरीत कार्य गरेको आरोपमा महासंघले रेडक्रसका सभापति सुदर्शनप्रसाद नेपाल, महामन्त्री भूपतिलाल श्रेष्ठ, कोषाध्यक्ष विनोदकुमार बस्नेत, उपमहामन्त्री मनोजकुमार थापा र सदस्य नारायण तिमिल्सिनालाई पदबाट बर्खास्त गरेको हो ।

 उनीहरूलाई आगामी दिनमा हुने निर्वाचनमा समेत भाग लिन नपाउने गरी प्रतिबन्ध लगाइएको रेडक्रस महासंघले जनाएको छ । लामो समय विवादमा फसेको रेडक्रसको गत निर्वाचनमा ती पदाधिकारीले नेपाली कांग्रेस, माओवादी केन्द्र र एकीकृत समाजवादीबीच गठबन्धन गरी भागबण्डा गर्ने समझदारी गरेका थिए ।

 त्यसैलाई प्रमाणको आधार मानेर रेडक्रस महासंघले रेडक्रसको अन्तर्राष्ट्रिय मान्यताहरू उल्लंघन भएको बताएको हो । देशभर रेडक्रसका संगठनमा दलका नेता कार्यकर्ताहरूको वर्चस्व छ । त्यस्तै, रेडक्रसका पदाधिकारी आर्थिक अनियमिततामा जोडिँदै आएका छन् ।